महापालिका करणार न्‍यू माहीम शाळा इमारतीची पुनर्बांधणी

महापालिका करणार न्‍यू माहीम शाळेच्या इमारतीची पुनर्बांधणी

मुंबई, ता. १० : महापालिकेच्या न्‍यू माहीम शाळेची इमारत पायाभूत सुविधा कक्षाने केलेल्या संरचनात्मक लेखापरीक्षणात अतिधोकादायक (सी १ वर्ग) ठरली आहे. त्रयस्थ सल्लागार संस्थांच्या तपासणीतही हेच निष्कर्ष निघाले असून, तांत्रिक सल्लागार समितीनेही ही इमारत पाडण्याचे आदेश दिले आहेत. यासंदर्भात आरोप-प्रत्यारोप सुरू आहेत. महापालिका प्रशासनाने याबाबत स्पष्टीकरण देताना सांगितले की, ‘न्‍यू माहीम शाळा इमारतीची पुनर्बांधणी महापालिकेमार्फतच होणार विद्यार्थ्यांच्या सुरक्षिततेला प्राधान्य देण्यात येणार आहे. विद्यार्थ्यांच्या सुरक्षिततेसाठी मराठी, हिंदी आणि इंग्रजी माध्यमातील विद्यार्थ्यांचे जवळच्या शाळांमध्ये स्थलांतरण करून शिक्षण सुरू ठेवण्यात आले आहे. या ठिकाणीच नव्या शाळेची पुनर्बांधणी करण्यात येणार असून, ती पूर्णपणे महापालिकेमार्फतच केली जाईल. कोणतेही खासगीकरण किंवा खासगी विकासकामाचा विचार नाही.’ दरम्यान, या शाळेच्या पुनर्बांधणी प्रकल्पाची निविदा प्रक्रिया सुरू असून, नोव्हेंबर अखेरपर्यंत कामाचा आदेश दिला जाणार आहे.