रुग्णालयातून वृद्ध आईला घरी नेण्यास टाळाटाळ

रुग्णालयातून वृद्ध आईला
घरी नेण्यास टाळाटाळ

मुलावर गुन्हा; न्यायालयाच्या आदेशाकडे दुर्लक्ष

मुंबई, ता. २२ : आजारी वयोवृद्ध आईला रुग्णालयात सोडून उपचारांचे शुल्क न देणाऱ्या आणि उच्च न्यायालयाच्या आदेशाकडे दुर्लक्ष करून तिला घरी नेण्यास टाळाटाळ करणाऱ्या मुलाविरोधात वांद्रे पोलिसांनी शनिवारी गुन्हा दाखल केला आहे. अमित पुरी असे त्याचे नाव असून, त्याच्याविराेधात होली फॅमिली हॉस्पिटलच्या प्रशासनाने तक्रार केली हाेती.
पोलिसांच्या माहितीनुसार, अमित यांनी पक्षघाताच्या झटक्यानंतर आई मोहिनी (वय ७५) यांना ऑगस्टमध्ये होली फॅमिली रुग्णालयात दाखल केले हाेते. दोन दिवसांच्या उपचारांनंतर मोहिनी यांची प्रकृती सुधारल्याने त्यांना अतिदक्षता विभागातून सर्वसाधारण कक्षात आणण्यात आले. मोहिनी यांना रुग्णालयात दाखल करताना अमित यांनी एक लाख रुपये जमा केले होते. उपचारांबाबतही त्यांना वेळोवेळी माहिती देण्यात येत हाेती. माेहिनी यांना प्रोटीनयुक्त भुकटी देण्यात आली; मात्र त्यांना अतिससाराचा त्रास झाला. तेव्‍हा अमित यांनी डॉक्टरांना शिवीगाळ केली. तसेच बिल मागताच वकिलांमार्फत नोटीस पाठवून रुग्णालयावर आरोप केले. त्यानंतर अमित यांना उपचार आणि खर्चाशी संबंधित कागदपत्रे पोलिसांसमक्ष दाखवण्याची तयारीही दर्शवली; मात्र त्यांनी रुग्णालयाशी संपर्क तोडून टाकला हाेता.
----
१८ नाेव्‍हेंबरपर्यंत घरी
नेण्याचा हाेता आदेश
अखेर रुग्णालयाने उच्च न्यायालयात रिट याचिका केली. न्यायालयाने १८ नोव्हेंबरपर्यंत मोहिनी यांना रुग्णालयातून घरी घेऊन जावे आणि भाभा रुग्णालयात दाखल करावे, असा आदेश दिला हाेता. या आदेशाचे पालन न झाल्याने अमित यांच्याविरुद्ध तक्रार आल्याचे पोलिसांनी सांगितले. त्यावरून ज्येष्ठ नागरिक, पालकांचे पालनपोषण व कल्याण अधिनियम आणि महाराष्ट्र वैद्यकीय अधिनियमातील कलमांनुसार गुन्हा करण्यात आला आहे.
----