‘पीएमजीपी’च्या रहिवाशांना १ जानेवारीपासून भाडे मिळणार

मुंबई : पुनर्विकासाच्या प्रतीक्षेत असलेल्या जोगेश्वरी पीएमजीपी वसाहतीचा पुनर्विकास म्हाडा स्वत: करणार आहे. त्यानुसार येथील रहिवाशांना १ जानेवारीपासून घरभाडे दिले जाणार आहे. तसेच जानेवारीअखेरपर्यंत संबंधित रहिवाशांनी घरे रिकामी करावीत, म्हणून म्हाडाकडून प्रयत्न सुरू आहेत. येथील १० क्रमांकाच्या इमारतीची पाण्याची टाकी दोन दिवसांपूर्वी कोसळली. त्यामुळे रहिवाशांना तातडीने भाडे देण्याची कार्यवाही केली जाणार असल्याचे अधिकाऱ्यांनी सांगितले.

पीएमजीपी वसाहतीच्या पुनर्वसन व विक्री घटकाचे बांधकाम करण्यासाठी म्हाडाने राज्य सरकारकडून अंतिम मंजुरी घेतली आहे. तसेच प्रकल्पासाठी ईपीसी कंत्राटदार म्हणून बी. जी. शिर्के कन्स्ट्रक्शन कंपनीची निवड केली आहे. त्या पार्श्वभूमीवर म्हाडाकडून येथील रहिवाशांना २० हजार रुपये मासिक भाडे दिले जाणार आहे. किमान २५ हजार रुपये भाडे दिले जावे, अशी रहिवाशांची मागणी आहे. त्यामुळे म्हाडा काय निर्णय घेणार, हे महत्त्वाचे ठरणार आहे.