राज्य सरकारला घरचा आहेर

राज्य सरकारला घरचा आहेर
भाजपच्या तीन आमदारांनी आणला भ्रष्टाचार चव्हाट्यावर

संजीव भागवत : सकाळ वृत्तसेवा
नागपूर, ता. १० : हिवाळी अधिवेशन सुरू असतानाच राज्यातील महायुती सरकारमधील भाजप नेते व सार्वजनिक बांधकाम मंत्री शिवेंद्रराजे भोसले यांच्या सार्वजनिक बांधकाम विभागातील निविदा प्रक्रियेत झालेला गैरप्रकार चव्हाट्यावर आला आहे. हा गैरप्रकार विरोधकांनी नव्हेतर सत्ताधारी भाजपच्या तीन आमदारांनी पुढे आणून सरकारला घरचा आहेर दिला आहे. अधिवेशन काळात आता राज्य सरकार मुंबई विभागाच्या कार्यकारी अभियंत्यावर कारवाई करणार का? याकडे आता सर्वांचे लक्ष लागले आहे.

भाजपचे अकोटचे आमदार प्रकाश भारसाकळे, मूर्तिजापूरचे आमदार हरीष पिंपळे आणि वरोरा येथील आमदार करण देवतळे यांनी हा भ्रष्टाचार समोर आणला आहे. त्यांनी सार्वजनिक बांधकाम मंत्री भोसले यांना पत्र लिहून विभागाच्या मुंबई शहर विभागाचे कार्यकारी अभियंता विद्याधर पाटस्कर यांनी शासन निर्णयानुसार कार्यवाही न करता आपल्या मर्जीतील कंत्राटदारांना लाभ देण्यासाठी मनमानी कार्यपद्धतीचा अवलंब केल्याचा आणि याव्दारे आर्थिक मलिदा कमावल्याचा गंभीर आरोप केला आहे. त्यामुळे त्यांच्यावर कारवाई करण्याची मागणीही या आमदारांनी स्वतंत्रपणे पाठविलेल्या पत्रात केली आहे.
भाजप आमदारांनी लिहिलेल्या पत्रांमध्ये सार्वजनिक बांधकाम विभागाच्या मुंबई शहर विभागाचे कार्यकारी अभियंता ऑक्टोबर २०२५ मध्ये ई-निविदा सूचना क्रमांक ४९, ५०, ५३ आणि ५४ प्रसिद्ध केली होती. ही ई-निविदा उघडण्याची अंतिम तारीख उलटल्यानंतरही पूर्णपणे निविदा न उघडता केवळ या निविदांमधील फक्त ठरावीक निविदेतील काही कामांच्या निविदा उघडून आपल्या मर्जीतील कंत्राटदारांना लाभ दिला आहे. सदर ई-निविदा सूचनामधील सद्य परिस्थितीत ७० टक्के ई-निविदा उघडलेल्या नसल्याचेही पत्रात नमूद करण्यात आले आहे.

चौकशीची मागणी
संबंधित प्रकरणात आर्थिक गैरप्रकार झाल्याची शक्यताही या आमदारांनी व्यक्त करत ही गंभीर बाब असल्याने संबंधित अधिकारी हे महाराष्ट्र नागरी सेवा अधिनियमातील (अपील व शिस्त) अधिनियम १९७९ मधील नियम ८ व १० नुसार गंभीर कारवाईस पात्र असल्याने यावर आपल्या स्तरावरून तत्काळ दखल घेऊन प्रधान सचिव सार्वजनिक बांधकाम विभाग यांना इलाका शहर कार्यकारी अभियंता यांची चौकशी करावी, अशी मागणी भाजप आमदारांनी पत्राद्वारे केली आहे.