वैभव ठाकर याच्या साथीदाराला अटक

वैभव ठाकर याच्या
साथीदाराला अटक

तळोजा कारागृहातून घेतला ताबा

सकाळ फॉलोअप

मुंबई, ता. १० : शासकीय अधिकारी असल्याचे भासवून सराफा व्यावसायिकाला २.८० कोटींचा गंडा घालणारा वैभव ठाकर याच्या साथीदारास लोकमान्य टिळक मार्ग पोलिसांनी बुधवारी (ता. १०) अटक केली. बिरजू सल्ला असे त्याचे नाव आहे. तो झवेरी बाजार येथील अनेक इमारतींचा मालक आहे. पोलिस ठाण्याचे वरिष्ठ निरीक्षक नितीन तडाखे यांनी या वृत्तास दुजोरा दिला.

बिरजू याने वैभव आणि तक्रारदार व्यावसायिक शैलेश जैन यांचा परिचय करून दिला होता. वैभव मुख्यमंत्री कार्यालयातील प्रथमवर्ग अधिकारी असून व्यवसाय वृद्धीत सहकार्य करेल, असे बिरजूने सांगितले होते. वैभवने विविध निमित्ताने जैन यांच्याकडून १.१५ कोटी रुपये आणि सुमारे दीड कोटींचे दागिने घेऊन फसवणूक केली. या कटात बिरजू सहभागी असल्याचा आरोप जैन यांनी केला होता. १२ कोटींच्या अन्य एका फसवणूक प्रकरणात बिरजू अटकेत होता. त्याचा बुधवारी तळोजा कारागृहातून ताबा घेऊन पोलिसांनी या प्रकरणात अटक केली.

पत्नीचा अटकपूर्व जामिनासाठी अर्ज
वैभवची पत्नी प्रियंका आणि सासू सुरेखा जैन यांनी अटकपूर्व जामिनासाठी सत्र न्यायालयात अर्ज केला असून त्यावर गुरुवारी सुनावणी अपेक्षित आहे. तक्रारदाराने १.१५ कोटी रुपये वैभवच्या सांगण्यावर प्रियंकाच्या कंपनी खात्यात वळते केले होते, तर दागिने सुरेखा यांना दिल्याचा दावा तक्रारीत केल्याने पोलिसांनी या दोघींना आरोपी केले आहे.