जाहिरात फलकांवर पालिकेची कारवाई

जाहिरात फलकांवर पालिकेची कारवाई

मुंबई, ता. १६ : महापालिका निवडणुकीसाठी आचारसंहिता लागू झाल्यानंतर तिची काटेकोर अंमलबजावणी करण्याचे स्पष्ट निर्देश अतिरिक्त महापालिका आयुक्त (शहर) डॉ. अश्विनी जोशी यांनी दिले आहेत. त्यानुसार उपआयुक्त (विशेष) चंदा जाधव यांच्या नेतृत्वाखाली गेल्या २४ तासांत व्यापक मोहीम राबविण्यात आली. या कारवाईत सरकारी, सार्वजनिक आणि खासगी मालमत्तांवरील जाहिराती हटविण्यात आल्या असून, दोषींविरोधात गुन्हे दाखल करण्याची प्रक्रिया सुरू करण्यात आली आहे. पालिकेच्या अहवालानुसार रविवारी (ता. १५) रोजी झालेल्या कारवाईत एकूण २,१०३ विनापरवाना जाहिरात साहित्ये हटविण्यात आली. यामध्ये पोस्टर्स १,३२३, बॅनर्स व झेंडे २९३, भिंतीवरील लेखन २६२, ३६४ हॉर्डिंग यांचा समावेश आहे. या मोहिमेत सरकारी मालमत्तांवरील २७०, तर खासगी मालमत्तांवरील १,८१३ फलकबाजीचा समावेश आहे. या प्रकरणात एकूण ३६४ गुन्हे दाखल करण्यात आले.