मानखुर्दमध्ये गॅस सिलिंडरचा स्फोट

मानखुर्दमध्ये गॅस सिलिंडरचा स्फोट

मुंबई, ता. १६ : मानखुर्द परिसरातील जनता नगर येथील ३० फूट रोडवरील एका चाळीत मंगळवारी (ता. १६) दुपारी साडेतीन वाजण्याच्या सुमारास गॅस सिलिंडरचा स्फोट झाला. या स्फोटात घराच्या छताचा काही भाग कोसळून दोन जण गंभीर जखमी झाले आहेत.
मिळालेल्या माहितीनुसार, जनता नगर येथील एका चाळीतील घरात अचानक गॅस सिलिंडरचा स्फोट झाला. स्फोटाच्या तीव्रतेमुळे घराच्या छताचा काही भाग खाली कोसळला. घटनेनंतर स्थानिक नागरिकांनी तत्काळ मदतकार्य करत जखमी दोघांना उपचारासाठी लोकमान्य टिळक रुग्णालयात दाखल केले. या घटनेची माहिती मिळताच अग्निशमन दल, स्थानिक पोलिस, अदाणी एनर्जी तसेच पालिका कर्मचाऱ्यांनी घटनास्थळी धाव घेतली. अग्निशमन दलाने परिस्थिती नियंत्रणात आणत आगीवर नियंत्रण मिळविले. दरम्यान, रात्री १० वाजता सायन रुग्णालयातील डॉक्टरांनी दिलेल्या माहितीनुसार जखमींना बर्न वॉर्डमध्ये दाखल करण्यात आले आहे. पृथ्वीपाल जसपाल (वय ४०) हे ३० टक्के, तर राजेश खिचड (वय २५) हे २५ टक्के भाजल्याने त्यांना इजा झाली आहे. त्यांची प्रकृती स्थिर असल्याची माहिती देण्यात आली आहे. या स्फोटाच्या कारणाचा तपास पोलिस आणि अग्निशमन दलाकडून सुरू आहे.
......