महालक्ष्मी केबल-स्टेड पुलाचा पूर्व विस्तार गुंडाळला

महालक्ष्मी केबल-स्टेड पुलाचा पूर्व विस्तार गुंडाळला!
तांत्रिक अडचणी आणि पोलिसांच्या नकारामुळे निर्णय
सकाळ वृत्तसेवा
​मुंबई, ता. १८ : दक्षिण मुंबईतील वाहतूक कोंडी फोडण्यासाठी प्रस्तावित असलेल्या महालक्ष्मी केबल-स्टेड पुलाच्या पूर्वेकडील विस्ताराला अखेर पूर्णविराम मिळाला आहे. तांत्रिक अडथळे, अतिक्रमणांचा विळखा आणि वाहतूक पोलिसांकडून मिळालेल्या नकारात्मक प्रतिसाद यामुळे मुंबई महापालिका प्रशासनाने हा निर्णय घेतला आहे.

​नेमका वाद काय होता?
जी दक्षिण विभागातील केशवराव खाडये मार्ग येथील बांधकामाधीन महालक्ष्मी केबल-स्टेड पुलाचा विस्तार एन. एम. जोशी मार्ग जंक्शन ते एस ब्रिज जंक्शनपर्यंत करण्याचे नियोजित होते. या कामासाठी नोव्हेंबर २०२२ मध्ये कार्यादेश देण्यात आले होते, मात्र सहपोलिस आयुक्त (वाहतूक) कार्यालयाने स्पष्ट केले की, या ठिकाणी पुलाचा विस्तार करण्याची तांत्रिक गरज नाही. पोलिसांच्या या भूमिकेमुळे ना-हरकत प्रमाणपत्र रखडले आणि प्रकल्पाचे भवितव्य टांगणीला लागले.

​कंत्राटदाराची माघार आणि पालिकेची बचत
या पुलाचे गेल्या दोन वर्षांपासून काम सुरू होऊ शकले नसल्याने कंत्राटदाराने (मेसर्स पीईडी आणि टी अँड टी जेव्ही) नाराजी व्यक्त केली होती. एकूण कामापैकी ६५ टक्के काम पूर्व बाजूचे होते. अतिक्रमणे न हटल्याने आणि पोलिस परवानगी नसल्याने कंत्राटदाराने हे काम वगळण्याची विनंती पालिकेला केली होती. जर हे काम रखडले असते, तर पालिकेला कंत्राटदाराला नुकसानभरपाई द्यावी लागली असती. हा संभाव्य आर्थिक भुर्दंड टाळण्यासाठी आयुक्तांनी पूर्व बाजूचे अंदाजे ६४.९० कोटींचे काम रद्द करण्यास मंजुरी दिली आहे. आता केवळ महालक्ष्मी रेसकोर्स पार्किंग लॉटमधून जाणारी पश्चिमेकडील मार्गिका पूर्ण केली जाईल.