विद्यापीठाचा दीक्षान्त समारंभ १७ जानेवारीला

विद्यापीठाचा दीक्षान्त
समारंभ १७ जानेवारीला

राज्यपाल अध्यक्षस्थानी, तर प्रा. अजयकुमार सूद प्रमुख पाहुणे

मुंबई, ता. १८ : मुंबई विद्यापीठाचा वार्षिक दीक्षान्त साेहळा १७ जानेवारी २०२६ रोजी सकाळी १० वाजता फाेर्ट येथील सर कावसजी जहांगीर दीक्षान्त सभागृहात आयोजित करण्यात आला आहे. या वेळी हा दीक्षान्त सोहळा आधुनिक तंत्रज्ञानाचा वापर करून अत्यंत हायटेकस्तरावर केला जाणार आहे. या दीक्षान्त समारंभाचे अध्यक्षस्थान महाराष्ट्र राज्याचे राज्यपाल तथा विद्यापीठाचे कुलपती आचार्य देवव्रत हे भूषवणार आहेत. भारत सरकारचे प्रमुख वैज्ञानिक सल्लागार प्रा. अजय कुमार सूद हे प्रमुख पाहुणे म्हणून उपस्थित राहणार आहेत.

समारंभाचे सन्माननीय अतिथी म्हणून उच्च व तंत्रशिक्षणमंत्री चंद्रकांत पाटील, राज्यमंत्री इंद्रनील नाईक, मुंबई विद्यापीठाचे कुलगुरू प्रा. रवींद्र कुलकर्णी, प्र. कुलगुरू प्राचार्य डॉ. अजय भामरे आणि कुलसचिव डॉ. प्रसाद कारंडे यांच्या उपस्थित हा कार्यक्रम पार पडणार आहे. कार्यक्रमासाठी अधिसभा, व्यवस्थापन परिषद, विद्या परिषदेचे मान्यवर सदस्य, विविध विद्याशाखांचे अधिष्ठाता, सहयोगी अधिष्ठाता यांच्यासोबत विविध महाविद्यालयांचे प्राचार्य आणि विभागप्रमुख, प्राध्यापक उपस्थित राहणार असल्याचे परीक्षा व मूल्यमापन मंडळाचे संचालक डॉ. पूजा रौंदळे यांनी सांगितले.
या वर्षीच्या दीक्षान्त समारंभात पदवी आणि पदव्युत्तर मिळून विविध विद्याशाखांतील दीड लाखांहून अधिक स्नातकांना पदव्या प्रदान करण्यात येणार आहेत. या कार्यक्रमाचे थेट प्रक्षेपण मुंबई विद्यापीठाच्या यूट्युब चॅनेलसह विविध समाजमाध्यमांवर करण्यात येणार आहे.