महाराष्ट्र स्त्रीमुक्ती परिषदेची राज्यव्यापी परिषद

महाराष्ट्र स्त्रीमुक्ती परिषदेची राज्यव्यापी परिषद
उद्यापासून तीन दिवस विविध कार्यक्रम

सकाळ वृत्तसेवा
मुंबई, ता. १८ : स्त्रीमुक्ती चळवळीला ५० वर्षे पूर्ण झाल्याने मुंबईतील यशवंतराव चव्हाण प्रतिष्ठान सेंटरमध्ये येत्या २०, २१ आणि २२ डिसेंबरला तीनदिवसीय राज्यव्यापी परिषदेचे आयोजन करण्यात आले आहे. या परिषदेत गेल्या ५० वर्षांतील स्त्री-चळवळीचा आढावा आणि पुढील ५० वर्षांच्या कामाची दिशाही ठरविण्यात येणार आहे.
परिषदेची माहिती देताना महाराष्ट्र स्त्रीमुक्ती परिषदेच्या अध्यक्ष शारदा साठे, उपाध्यक्ष चयनिका शहा, सचिव ॲड. निशा शिवूरकर आणि खजिनदार डॉ. छाया दातार यांनी माध्यमांना संबोधित केले. तसेच या वेळी महाराष्ट्र स्त्रीमुक्ती परिषदेच्या सदस्या लता भिसे सोनावणे, मनीषा गुप्ता, हसीना खान, सुनीता बागल आणि शुभदा देशमुख उपस्थित होत्या. सुकाणू समितीच्या सदस्यांनी गुरुवारी पत्रकार परिषदेच्या माध्यमातून, ‘आम्ही सर्व महाराष्ट्राच्या २५ जिल्ह्यांतून येणाऱ्या प्रतिनिधींचे स्वागत करण्यास सज्ज आहोत,’ असे सांगितले. या परिषदेत राज्यभरातील महिला संघटना, कार्यकर्ते आणि तज्ज्ञ मोठ्या संख्येने सहभागी होणार आहेत.
...
गटचर्चा, परिसंवाद...
- तीन दिवसांच्या या परिषदेत पहिल्या दिवशी घरगुती हिंसाचार, कामाच्या ठिकाणी होणारा छळ, वैवाहिक व कौटुंबिक हिंसाचार, जातीय व सांप्रदायिक हिंसाचार, तसेच संविधानासमोरील आव्हाने यांसारख्या विषयांवर गटचर्चा व परिसंवाद आयोजित करण्यात आला आहे.
- दुसऱ्या दिवशी आर्थिक व राजकीय स्थिती, सार्वजनिक वाहतूक, पर्यावरण व विकास, तसेच नवीन कामगार कायदे या विषयावर तज्ज्ञ मते मांडणार आहेत. परिषदेदरम्यान नाटक, माहितीपट आणि नृत्यनाट्य, असे सांस्कृतिक कार्यक्रमही सादर केले जातील.
- परिषदेच्या तिसऱ्या व शेवटच्या दिवशी मुंबईतील आझाद मैदानात स्त्रीमुक्ती परिषदेची जाहीर सभा होणार आहे. या सभेत विविध समुदायांची निवेदने सादर केली जाणार आहेत. याशिवाय परिषदेच्या पुढील कामाची दिशा ठरवली जाणार आहे.