आगीत होरपळलेल्या महिलेचा मृत्यू

आगीत होरपळलेल्या महिलेचा मृत्यू
दोघांची मृत्यूशी झुंज

सकाळ वृत्तसेवा
​मुंबई, ता. २८ : अंधेरी पूर्व येथील रमाबाई आंबेडकरनगरमधील एका चाळीला रविवारी (ता. २१) लागलेल्या आगीत जखमी झालेल्या महिलेचा उपचारादरम्यान मृत्यू झाला. या आगीत होरपळलेले अन्य दोन जण सध्या कस्तुरबा रुग्णालयातील अतिदक्षता विभागात उपचार घेत असून त्यांची प्रकृती चिंताजनक असल्याचे वैद्यकीय सूत्रांनी सांगितले.
अंधेरी पूर्व येथील रमाबाई आंबेडकरनगरमधील एक मजली चाळीत रविवारी सकाळी आग लागली होती. यात घरातील रहिवासी गंभीररीत्या होरपळले होते. मिळालेल्या माहितीनुसार, या आगीत जखमी झालेल्या वीणा प्रदीप भोईटे यांचा बुधवारी (ता. २४) रात्री १०.०३ वाजता कस्तुरबा रुग्णालयात उपचारादरम्यान मृत्यू झाला. कस्तुरबा रुग्णालयातील मुख्य वैद्यकीय अधिकाऱ्यांनी याला अधिकृत दुजोरा दिला आहे. याच आगीत जखमी झालेले नामदेव सकपाळ आणि लक्ष्मी सकपाळ हे दोघेही सध्या कस्तुरबा रुग्णालयात ऑक्सिजनवर असून त्यांना अतिदक्षता विभागात ठेवण्यात आले आहे.