शिवाजी पार्कवर रंगणार रणधुमाळी!

शिवाजी पार्कवर रंगणार रणधुमाळी!
ठाकरे बंधूंची रविवारी, तर महायुतीची सोमवारी सभा
सकाळ वृत्तसेवा
मुंबई, ता. ७ : महापालिका निवडणुकीची जवळ येत आहे, तसा प्रचारही जोर धरत आहे. मुंबईच्या राजकारणाचा केंद्रबिंदू असलेल्या ऐतिहासिक शिवाजी पार्कवर प्रचाराची रणधुमाळी रंगणारा आहे. महापालिकेने दिलेल्या परवानगीनुसार, ११ जानेवारीला उद्धव ठाकरे आणि राज ठाकरे यांची संयुक्त सभा होणार असून, दुसऱ्या दिवशी १२ जानेवारीला मुख्यमंत्री देवेंद्र फडणवीस आणि उपमुख्यमंत्री एकनाथ शिंदे यांची सभा होणार आहे.
मुंबईसह राज्यातील २९ महापालिकांच्या निवडणुकीमुळे राजकीय वातावरण तापले आहे. मुख्यमंत्री, उपमुख्यमंत्र्यांनी प्रचाराचा धडाका लावला असताना, ठाकरे बंधूही शाखा भेटी आणि मुलाखतींच्या माध्यमातून वातावरण निर्मिती करत आहेत. शिवाजी पार्कवर सांगता सभा घेण्यासाठी शिवसेना ठाकरे गट, मनसे, शिवसेना शिंदे गट आणि भाजप या चारही पक्षांनी महापालिकेकडे परवानगी मागितली होती. प्रशासनाने यावर तोडगा काढत ११ जानेवारीची तारीख ठाकरे बंधूंसाठी, तर १२ जानेवारीची तारीख ''महायुतीसाठी'' निश्चित केली आहे. तब्बल दोन दशकांनंतर ठाकरे बंधू शिवाजी पार्कवरील मैदानात एकाच व्यासपाठीवर एकत्र येणार आहे. त्यानंतर १२ जानेवारीला होणारी महायुतीची सभा ही निवडणुकीच्या प्रचाराची सांगता सभा असेल. यात देवेंद्र फडणवीस आणि एकनाथ शिंदे ठाकरेंच्या आरोपांना कसे प्रत्युत्तर देतात, हे पाहणे औत्सुक्याचे ठरणार आहे. दोन्ही बाजूंनी ‘मुंबई कुणाची?’ या मुद्द्यावर शक्तीप्रदर्शन करण्याची तयारी केली आहे.