‘आरटीई’साठी आजपासून शाळा नोंदणीला सुरुवात

‘आरटीई’साठी आजपासून
शाळा नोंदणीला सुरुवात
मुंबई, ता. ८ ः शिक्षण अधिकार कायद्यानुसार राज्यातील खासगी व्यवस्थापनाच्या शाळांमध्ये राखीव असलेल्या २५ टक्के जागांवरील आरटीई प्रवेश प्रक्रियेला आजपासून सुरुवात होत आहे. राज्यातील विनाअनुदानित व स्वयंअर्थसहाय्यित शाळा नोंदणी आणि पडताळणीची लिंक सुरू करण्यात आल्याची माहिती प्राथमिक शिक्षण संचालक शरद गोसावी यांनी दिली. शाळा पडताळणी करताना, बंद झालेल्या शाळा, अल्पसंख्याक दर्जाच्या शाळा, अनधिकृत शाळा तसेच स्थलांतरीत झालेल्या शाळांची नोंद होणार नाही, याची जबाबदारी प्राथमिक शिक्षणाधिकारी यांच्यावर निश्चित करण्यात आली आहे. शाळांच्या नोंदणीची प्रक्रिया १९ जानेवारीपर्यंत पूर्ण करावी, असे आदेशही संचालकांनी दिले आहेत.