किशोरी पेडणेकरांची उमेदवारी रद्द करा!

किशोरी पेडणेकरांची उमेदवारी रद्द करा!
आमदार नीलेश राणे यांची मागणी

सकाळ वृत्तसेवा
मुंबई, ता. ९ : कोविड काळात खिचडी घोटाळा, बॉडी बॅग घोटाळ्याप्रकरणी गुन्हे दाखल झालेल्या ठाकरे गटाच्या उमेदवार किशोरी पेडणेकर यांची उमेदवारी रद्द करण्याची मागणी शिवसेना आमदार नीलेश राणे यांनी केली आहे. पेडणेकर यांनी उमेदवारी अर्जात गुन्ह्यांची माहिती लपवली असून त्याविरोधात कायदेशीर लढाईचे संकेत आमदार राणे यांनी दिले. बाळासाहेब भवन येथे आयोजित पत्रकार परिषदेत ते बोलत होते.
आमदार राणे म्हणाले, की महापालिकेच्या वॉर्ड क्रमांक १९९ मधील ठाकरे गटाच्या उमेदवार किशोरी पेडणेकर यांच्यावर २०२३ मध्ये दोन फौजदारी गुन्हे दाखल झाले आहेत. त्या आता जामिनावर बाहेर आहेत; मात्र पेडणेकर यांनी निवडणुकीत उमेदवारी अर्जात ही माहिती लपवली आहे. पेडणेकर यांना उमेदवारी देण्यात आली नव्हती; मात्र त्यांनी उद्धव ठाकरे आणि रश्मी ठाकरे यांना धमकी देऊन त्यांनी उमेदवारी मिळवली. कोविडमधील सगळं बाहेर काढेन, असे ठाकरेंना सांगून ब्लॅकमेल केले आणि तिकीट मिळवले, असे आमदार राणे म्हणाले. एक गुन्हा बॉडी बॅग घोटाळ्याचा आहे. दुसरा गुन्हा एसआरए प्रकल्पासंदर्भात झालेला आहे, असे त्यांनी सांगितले. पेडणेकर यांनी निवडणूक प्रक्रियेतून बाहेर पडावे. याप्रकरणी पेडणेकर १०० टक्के अपात्र ठरतील. या प्रकरणात सर्वोच्च न्यायालयात दाद मागू, असे आमदार राणे म्हणाले. दरम्यान, उद्धव ठाकरे मुंबईत इतकी वर्षे सत्तेत असताना कोणती विकासकामे केली, हे त्यांनी सांगावीत, असेही राणे म्हणाले. राज ठाकरेंकडून चांगल्या विषयाची अपेक्षा होती; मात्र त्यांचे विचार पाहून ती फोल ठरली, असेही ते म्हणाले.