परळ येथील इमारतीला आग

परळ येथील इमारतीला आग

मुंबई, ता. ९ : परळ येथील सयानी रोडवर असलेल्या लोढा ग्रँडेर या इमारतीत शुक्रवारी (ता. ९) सायंकाळी भीषण आगीची घटना घडली. या वेळी अग्निशमन दलाने तत्काळ घटनास्थळी धाव घेत या आगीवर नियंत्रण मिळविले. लोढा ग्रँडेर या इमारतीच्या तळमजल्यावरील बांबूने पेट घेतल्यामुळे काही वेळातच संपूर्ण इमारतीमध्ये मोठ्या प्रमाणात धूर साचला. यामुळे इमारतीतील रहिवाशांमध्ये काही काळ घबराटीचे वातावरण निर्माण झाले. घटनेची माहिती मिळताच मुंबई अग्निशमन दल, स्थानिक पोलिस, अदाणी पॉवर, पालिकेच्या विभाग कार्यालयीन कर्मचारीवर्गाने घटनास्थळी धाव घेतली. अग्निशमन दलाने अथक परिश्रमानंतर ७ वाजून ३६ मिनिटांनी या आगीवर नियंत्रण मिळविले.