डॉ. संग्राम पाटील विमानतळावरून ताब्यात

डॉ. संग्राम पाटील विमानतळावरून ताब्यात
नोटीस देऊन सोडल्याचा पोलिसांचा दावा; गुन्हा नोंद

मुंबई, ता. १० : केंद्र सरकार आणि भाजप नेत्यांच्या कार्यप्रणालीवर टीका करणारे लंडनस्थित भारतीय वंशाचे डॉक्टर आणि यूट्युबर डॉ. संग्राम पाटील आणि त्यांच्या पत्नीस शनिवारी (ता. १०) पहाटे मुंबई पोलिसांनी विमानतळावर ताब्यात घेतले. अनेक तास त्यांच्याकडे चौकशी करण्यात आली. या कारवाईबाबत पुरोगामी वलयातून समाजमाध्यमांवर टीकेची झोड उठली.

पोलिस प्रवक्ते राजतिलक रोशन यांनी दिलेल्या माहितीनुसार ‘डॉ. पाटील यांना अटक करण्यात आलेली नाही. त्यांना भारतीय नागरिक सुरक्षा संहितेतील कलम ३५(३) निसार नोटीस देण्यात आली असून प्रकरणाचा तपास सुरू आहे.’ गेल्या महिन्यात भाजपचे प्रदेश सोशल मीडिया सहसंयोजक निखिल भामरे यांनी दिलेल्या तक्रारीआधारे मुंबईतील ना. म. जोशी मार्ग पोलिसांनी डॉ. पाटील यांच्याविरोधात भारतीय न्याय संहितेतील ३५३ (२) कलमानुसार गुन्हा नोंदवला होता. भामरे यांच्या तक्रारीनुसार ‘शहर विकास आघाडी आणि डॉ. पाटील यांच्या नावे असलेल्या फेसबुक खात्यांवरून भाजप आणि प्रमुख नेत्यांबाबत अवमानकारक आणि दोन घटकांमध्ये वैमनस्य पसरेल, असा मजकूर, अफवा पसरवली गेली.’ दरम्यान, मुंबई पोलिसांच्या कारवाईनंतर डॉ. पाटील यांनी ‘मला चौकशी करून सोडण्यात आले. पोलिसांना अपेक्षित सगळी माहिती दिली. मला पोलिसांनी नोटीस बजावली आहे. त्यास भारतातून निघण्यापूर्वी उत्तर देईन. तपासाच्या या प्रक्रियेमुळे माझ्या प्रवासावर कोणतेही बंधन घालण्यात आलेले नाही; मात्र ३५ ते ४० तासांत प्रवास आणि नंतर पोलिस चौकशीमुळे शारीरिक त्रास निश्चित झाला,’ अशी प्रतिक्रिया पाटील यांनी दिली.