मंत्री नितेश राणेंच्या बंगल्याबाहेर बेवारस बॅग

मंत्री नितेश राणेंच्या बंगल्याबाहेर बेवारस बॅग

मुंबई, ता. ११ ः मंत्री नितेश राणे यांच्या मरीन ड्राइव्ह येथील शासकीय निवासस्थानाबाहेर रविवारी (ता. ११) सकाळी बेवारस प्रवासी बॅग आढळल्याने काही काळासाठी तणाव निर्माण झाला होता. तपासणीअंती या बॅगेत बूट आणि कपडे आढळले. ही बॅग अमेरिकन नागरिकाने तेथे सोडली होती. त्यात एक चिठ्ठी पोलिसांना सापडली. बॅग आणि त्यातील वस्तू मोफत आहेत, कोणीही घेऊ शकते, असे नमूद केले होते.
पोलिसांनी दिलेल्या माहितीनुसार, नितेश यांच्या शासकीय निवासस्थानातील कर्मचाऱ्यांनी सकाळी ९.३० वाजता ही बेवारस बॅग पाहिली. त्यांनी मरीन ड्राइव्ह पोलिसांना त्याबाबत कळवले. पोलिस, बॉम्बशोधक-नाशक आणि श्वान पथक तेथे दाखल झाले. बॅग उघडली तेव्हा त्यात बूट आणि कपडे आढळले. सोबत चिठ्ठीही आढळली. शासकीय निवासस्थानी लागलेल्या सीसीटीव्ही कॅमेऱ्याच्या चित्रणात बॅग सोडणाऱ्या अमेरिकन नागरिकाचा चेहरा चित्रित झाला आहे. त्या आधारे पोलिसांनी त्याची ओळख पटवली. सुमारे ४० वर्षांचा अमेरिकन तरुण काही दिवस मरीन ड्राइव्ह येथील सी ग्रीन हॉटेलमध्ये थांबला होता. तो मुंबईहून गोव्याला गेला. गोव्याला जाण्यापूर्वी त्याने ही बॅग राणे यांच्या बंगल्याबाहेर सोडल्याचे स्पष्ट झाले.