माजी आमदार नीला देसाई यांचे निधन

सकाळ वृत्तसेवा
​मुंबई, ता. १७ : शिवसेनेच्या पहिल्या महिला आमदार आणि ज्येष्ठ नेत्या नीला देसाई यांचे शुक्रवारी (ता. १६) रात्री उशिरा हृदयविकाराच्या तीव्र झटक्याने निधन झाले. त्या ८० वर्षांच्या होत्या. त्यांच्या पार्थिवावर शनिवारी दुपारी ओशिवरा स्मशानभूमीत अंत्यसंस्कार करण्यात आले.
शुक्रवारी रात्री १० वाजण्याच्या सुमारास त्यांना अस्वस्थ वाटू लागले. त्यांना तातडीने उपचारासाठी रुग्णालयात नेण्यात आले; मात्र उपचारापूर्वीच त्यांची प्राणज्योत मालवली. मुंबई महापालिका निवडणुकीत ठाकरे गटाला अपेक्षित यश मिळाले नसल्याचे चित्र स्पष्ट होत असतानाच काही तासांतच या ज्येष्ठ नेत्याच्या निधनाने पक्षावर दुहेरी आघात झाला आहे.
​
​नीला देसाई यांची ओळख शिवसेनेच्या अत्यंत निष्ठावंत आणि जुन्या पिढीतील नेत्या म्हणून होत्या. १९९० मध्ये त्या विलेपार्ले विधानसभा क्षेत्रातून निवडून येत शिवसेनेच्या पहिल्या महिला आमदार ठरल्या होत्या. ‘एक संयमी, अनुभवी आणि निष्ठावंत नेतृत्व हरपले,’ अशा शब्दांत उद्धव ठाकरे आणि इतर ज्येष्ठ नेत्यांनी त्यांना श्रद्धांजली वाहिली.