‘घडाळ्या’बरोबर आघाडी नाही

‘घड्याळ’बरोबर आघाडी नाही
काँग्रेसची स्पष्‍ट भूमिका; शक्य तिथे समविचारी पक्षाशी सहकार्य
सकाळ वृत्तसेवा
मुंबई, ता. १८ : नगरपालिका व महापालिका निवडणुकीत काँग्रेसने इंडिया आघाडीतील घटक पक्षांशी आघाडी केली, त्याच पद्धतीने जिल्हा परिषद व पंचायत समिती निवडणुकीत आघाडी केली जाईल. जेथे आघाडी करणे शक्य आहे तेथे आघाडी केली जाईल; पण घड्याळाशी आघाडी केली जाणार नाही, असे काँग्रेस प्रदेशाध्यक्ष हर्षवर्धन सपकाळ यांनी स्पष्ट केले.

काँग्रेसच्या राज्य निवड मंडळाची बैठक काँग्रेस प्रदेशाध्यक्ष हर्षवर्धन सपकाळ यांच्या अध्यक्षतेखाली टिळक भवन येथे रविवारी (ता. १८) झाली. या बैठकीला माजी मुख्यमंत्री पृथ्वीराज चव्हाण, माजी मंत्री बाळासाहेब थोरात, नसीम खान यांच्यासह राज्य निवड मंडळाचे सदस्य उपस्थित होते. या बैठकीत जिल्हा परिषद निवडणुकीच्या रणनीतीवर सविस्तर चर्चा करण्यात आली.

‘वंचित’सोबत युतीचे संकेत
लातूर व नांदेड महापालिकेत दोन्ही पक्ष आघाडी करून योग्य पद्धतीने निवडणुकीला सामोरे गेले. ‘वंचित’बरोबरची आघाडी ही आकड्यांचा खेळ नाही तर विचारांचा मेळ आहे. दोन्ही पक्षांमध्ये योग्य समन्वय असून जी टीका केली जात आहे ती एकांगी आहे, असे सपकाळ यांनी सांगितले.

अहिल्यादेवींच्या स्मृती पुसण्याचा डाव
भाजप आणि पंतप्रधान नरेंद्र मोदी यांनी वाराणसीमधील पुण्यश्लोक अहिल्यादेवींनी बांधलेल्या मणिकर्णिका घाटावर बुलडोझर चालवला आहे. त्यांना अहिल्यादेवींच्या स्मृती पुसून टाकायच्या आहेत म्हणूनच अत्यंत निर्दयी व विकृतपणे घाट व घाटावरील मूर्ती नष्ट करण्यात आल्याचा आरोप हर्षवर्धन सपकाळ यांनी केला. अहिल्यादेवींचा अपमान महाराष्ट्राची जनता कदापि सहन करणार नाही. भाजप आणि मोदींच्या या कृतीविरोधात काँग्रेस पक्ष रस्त्यावर उतरून तीव्र विरोध करेल, असा इशाराही सपकाळ यांनी दिला आहे.