ठाकरे बंधू पुन्हा एकाच मंचावर!

ठाकरे बंधू पुन्हा एकाच मंचावर!
शिवसेनाप्रमुखांचे जन्मशताब्दी वर्ष सुरू

सकाळ वृत्तसेवा
​मुंबई, ता. २२ : शिवसेनाप्रमुख बाळासाहेब ठाकरे यांच्या जयंतीनिमित्त महाराष्ट्राच्या राजकारणात पुन्हा एकदा मोठी घडामोड पाहायला मिळणार आहे. मुंबई महापालिका निवडणुकीच्या निकालानंतर उद्धव ठाकरे आणि राज ठाकरे पहिल्यांदाच एका मंचावर एकत्र दिसणार आहेत. २३ जानेवारीला होणारा हा कार्यक्रम ठाकरे बंधूंच्या भविष्यातील राजकीय रणनीतीच्या दृष्टीने अत्यंत महत्त्वाचा मानला जात आहे.
​यंदाचे वर्ष ठाकरे गटासाठी विशेष आहे. कारण शिवसेनाप्रमुख बाळासाहेब ठाकरे यांच्या जन्मशताब्दी वर्षाची ही सुरुवात आहे. या ऐतिहासिक मुहूर्तावर दोन्ही बंधू एकत्र येत असल्याने शिवसैनिक आणि मनसे कार्यकर्त्यांमध्ये उत्साहाचे वातावरण आहे. ​नुकत्याच झालेल्या महापालिका निवडणुकीत भाजपच्या नेतृत्वाखालील महायुतीने बहुमत मिळवले आहे. या निवडणुकीत अपेक्षित यश मिळाले नसले तरी दोन्ही भावांनी मराठी माणसाच्या हितासाठी एकत्र लढण्याचे संकेत दिले आहेत. उद्धव ठाकरे यांनी स्पष्ट केले, की महापालिका निकालानंतरही आमची युती कायम आहे. ही लढाई अद्याप संपलेली नाही. जोपर्यंत मराठी माणसाला त्याचा हक्क आणि सन्मान मिळत नाही तोपर्यंत आमचा संघर्ष कायम राहील.
...
सोबत राहण्याचीच भूमिका
​राजकीय विश्लेषकांच्या मते, आगामी तीन वर्षे महाराष्ट्रात कोणत्याही मोठ्या निवडणुका नाहीत. अशा परिस्थितीत दोन्ही नेत्यांकडे नवीन रणनीती आखण्यासाठी पुरेसा वेळ आहे. यादरम्यान ​मराठी मतांचे विभाजन टळणार असून, मराठी मतदारांमध्ये कोणताही संभ्रम राहू नये, यासाठी दोन्ही नेत्यांनी सध्या तरी सोबत राहण्याचीच भूमिका घेतली आहे. महापौरपदाचे स्वप्न पूर्ण झाले नसले तरी जमिनीवरील कार्यकर्त्यांची निष्ठा विकत घेता येत नाही, हे या निकालांनी सिद्ध केल्याचे उद्धव ठाकरेंनी ठामपणे सांगितले आहे. ​बाळासाहेबांच्या जयंतीनिमित्त होणाऱ्या या सोहळ्यात राज आणि उद्धव ठाकरे कोणती मोठी घोषणा करतात का, याकडे संपूर्ण राज्याचे लक्ष लागले आहे. महायुतीच्या विजयानंतर ठाकरे बंधूंची ही जवळीक राज्याच्या राजकारणात कोणते नवे वळण घेते, हे पाहणे महत्त्वाचे ठरेल.