आभासी अटकेतून सुटण्यासाठी घर विकले

आभासी अटकेतून सुटण्यासाठी घर विकले
मुंबई, ता. २८ ः मुलुंड येथील वृद्ध दाम्पत्याला आभासी अटकेत ठेवून १.१६ कोटी रुपये उकळणाऱ्या सायबर भामट्यांविरोधात गुन्हा नोंदवण्यात आला आहे. भामट्यांनी पोलिस असल्याचे भासवून इतके घाबरवले की या दाम्पत्याने आपले घर विकले.
तक्रारदार ७८ वर्षीय असून, खासगी कंपनीतून मोठ्या हुद्द्यावरून निवृत्त झाले आहेत. त्यांना गेल्या वर्षी डिसेंबर महिन्यात पोलिस असल्याचे भासवून भामट्यांनी संपर्क साधला. कोटींचे आर्थिक गैरव्यवहार केल्याबद्दल गुन्हा नोंदवल्याचे सांगितले. बँक खात्यावरील जमा, गुंतवणूक, मालमत्तांचे तपशील घेण्यात आले. तपासासाठी सर्व मालमत्ता जमा करावी लागेल. निर्दोष असल्याचे आढळल्यास ती परत केली जाईल, असे सांगितले. त्यानुसार दाम्पत्याने घर विकले, बँकेतील जमा रक्कम भामट्यांनी सांगितलेल्या खात्यांवर वळती केली, असे पोलिसांनी सांगितले.