छतावरील सौरऊर्जा प्रकल्पाच्या खर्चात कपात

छतावरील सौरऊर्जा प्रकल्पाच्या खर्चात कपात
- महावितरणच्या टेंडरनुसार ४५ हजारांत एक किलोवॉटचा सौर प्रकल्प
- १५ हजारांची बचत, वीज ग्राहकांचा फायदा

सकाळ वृत्तसेवा
मुंबई, ता. १ : महिना शंभर युनिटपर्यंत वीज वापर असलेल्या घरगुती वीज ग्राहकांना मोफत वीज मिळण्यासाठी राज्य सरकारने सुरू केलेल्या स्वयंपूर्ण महाराष्ट्र आवासीय रूफ टॉप सोलर (स्मार्ट) योजनेच्या माध्यमातून प्रति किलोवॉटमागे ग्राहकांचे १५ हजार रुपये वाचणार आहेत. सध्या सौरऊर्जा पुरवठादार एका किलोवॉटचा छतावर सौर प्रकल्प उभारण्यासाठी ६० हजार रुपये आकारत आहेत. मात्र स्मार्ट योजनेसाठी महावितरणने मागविलेल्या टेंडरमध्ये एक किलोवॉट क्षमतेच्या छतावरील सौरऊर्जा प्रकल्पाची किंमत सुमारे ४५ हजार रुपये निश्चित करण्यात आली आहे. त्यामुळे ग्राहकांना मोठा दिलासा मिळणार आहे.
राज्य सरकारच्या मुख्यमंत्री निर्देशानुसार महावितरणकडून गरीब ग्राहकांसाठी स्मार्ट योजना राबविण्यात येत आहे. महावितरणचे अध्यक्ष तथा व्यवस्थापकीय संचालक लोकेश चंद्र यांच्या अध्यक्षतेखाली शनिवारी मुंबईत झालेल्या कंपनीच्या संचालक मंडळाच्या बैठकीत स्मार्ट योजनेच्या टेंडरला मान्यता देण्यात आली. बैठकीस राज्याच्या अपर मुख्य सचिव (ऊर्जा) आभा शुक्ला उपस्थित होत्या. राज्य सरकारच्या स्वयंपूर्ण महाराष्ट्र आवासीय रूफ टॉप सोलार (स्मार्ट) योजनेच्या शासन निर्णयात प्रति किलोवॅट ५० हजार रुपये खर्च गृहीत धरला आहे. सध्या व्यवहारात सोलर पुरवठादार व्यावसायिक ग्राहकांकडून प्रति किलोवॉट सुमारे साठ हजार रुपये आकारत आहेत. पण महावितरणने आज मंजूर केलेल्या टेंडरमध्ये प्रति किलोवॉट ४५ हजार ४५० रुपये इतकी रक्कम स्पष्ट करण्यात आली आहे. त्यामुळे या योजनेत ग्राहकाने भरायच्या हिश्श्याच्या रकमेत आता मोठी कपात होईल.
महावितरणने स्मार्ट योजनेसाठी मागवलेल्या टेंडरमध्ये एक किलोवॉटच्या सौरऊर्जा प्रकल्पासाठी ४५,४५० रुपये इतका कमी दर निश्चित झाल्यामुळे आता अन्य गरजू वीज ग्राहकांनाही लाभ होणार आहे. प्रधानमंत्री सूर्यघर मोफत वीज योजनेत सरकारी अनुदानाशिवाय उर्वरित रक्कम ग्राहकाला भरावी लागते. या रकमेत मोठी घट झाल्यामुळे छोट्या गरजू वीज ग्राहकांना योजनेचा लाभ घेणे अधिक सोपे होईल.