लग्नासाठी आरोपीचा अंतरिम जामीनासाठी अर्ज

लग्नासाठी आरोपीचा अंतरिम जामिनासाठी अर्ज

रोहित शेट्टी गोळीबार प्रकरण

सकाळ वृत्तसेवा
मुंबई, ता. ११ : चित्रपट दिग्दर्शक रोहित शेट्टीच्या घरावरील गोळीबारप्रकरणी अटकेत असलेल्या बारा आरोपींपैकी एकाने आपल्या लग्नासाठी अंतरिम जामिनासाठी अर्ज केला आहे. आरोपी ऋतिक यादवने ११ मार्चला आग्रा येथे होणाऱ्या आपल्या विवाहासाठी तात्पुरता जामीन मंजूर करण्याची मागणी केली.

महाराष्ट्र संघटित गुन्हे नियंत्रण कायदा (मकोका) न्यायालयाचे न्या. सत्यनारायण नवंदर यांनी आरोपीला न्यायालयीन कोठडी सुनावली आहे. ॲड. दिलीप शुक्ला यांच्यामार्फत दाखल केलेल्या अर्जात, यादवचा विवाह ११ मार्चला आग्रा या मूळ गावी होणार असल्याचे म्हटले आहे. दरम्यान, या गोळीबार प्रकरणात अटक करण्यात आलेले सर्व १२ आरोपी सध्या न्यायालयीन कोठडीत आहेत. यादव हा १४ फेब्रुवारीला हरियाना आणि उत्तर प्रदेशमधून अटक करण्यात आलेल्या सात आरोपींपैकी एक आहे. त्यामध्ये शूटर दीपक शर्माचाही समावेश आहे. १ फेब्रुवारीला जुहू येथील रोहित शेट्टीच्या नऊ मजली इमारतीच्या पहिल्या मजल्यावर किमान पाच गोळ्या झाडण्यात आल्या होत्या. कुख्यात गुंड लॉरेन्स बिश्नोई टोळीचा सदस्य शुभम लोणकरने समाजमाध्यमांवर पोस्ट करून या घटनेची जबाबदारी स्वीकारल्याचा दावा केला होता.