३३ बांधकामांवर वर्सोव्यात हाताेडा

३३ बांधकामांवर
वर्सोव्यात हाताेडा

सकाळ वृत्तसेवा
​मुंबई, ता. २३ : मुंबई किनारी रस्ता (उत्तर) प्रकल्पातील अडथळे दूर करण्यासाठी महापालिकेच्या के-पश्चिम विभागाने आज मोठी कारवाई केली. वेसावे येथील प्रकल्पाच्या मार्गात येणाऱ्या ३३ बेकायदा बांधकामे पाडण्यात आली आहेत. यामुळे वेसावे ते दहिसरदरम्यानच्या कामाला गती मिळणार आहे.

​अतिरिक्त महापालिका आयुक्त अभिजित बांगर यांच्या मार्गदर्शनाखाली झालेली ही कारवाई उपायुक्त भाग्यश्री कापसे आणि सहाय्यक आयुक्त चक्रपाणी अल्ले यांच्या नेतृत्वाखाली पार पडली. हटवलेल्या बांधकामांत तीन निवासी आणि २९ व्यावसायिक गाळ्यांचा समावेश आहे. यातील एका मालमत्ताधारकाने न्यायालयात याचिका दाखल केली असून त्यावर उद्या (ता. २४) सुनावणी होणार आहे.
​
मोहिमेदरम्यान म्हाडाच्या अखत्यारीत येणाऱ्या आणखी १२ बांधकामांवर नियमानुसार कारवाई प्रस्तावित आहे. आजच्या कारवाईसाठी के-पश्चिम विभागाचे अतिक्रमण निर्मूलन पथक आणि वेसावे पोलिस ठाण्याचा मोठा बंदोबस्त तैनात करण्यात आला होता. किनारी रस्त्याचे काम विहित वेळेत पूर्ण करण्यासाठी पालिकेने आता आक्रमक पावले उचलली आहेत.
.........