सहाशे रुपयांच्या वादात व्यावसायिकाचा ॲसिड हल्ला

ॲसिड हल्ल्यात सात जण जखमी

मुंबई, ता. २ ः करार गावात सहाशे रुपयांवरून झालेल्या वादात एका व्यक्तीने सहा ते सात जणांना ॲसिडमिश्रित पाणी फेकून जखमी केले. समरबहाद्दूर सिंग (३८) असे या व्यक्तीचे नाव असून तो इमिटेशन ज्वेलरीचा व्यवसाय करतो. त्याच्याविरोधात कुरार पोलिसांनी गुन्हा नोंद केला आहे.
पोलिसांनी दिलेल्या माहितीनुसार ही घटना बुधवारी दुपारी घडली. या हल्ल्यात ॲसिडमिश्रित पाण्याचे शिंतोडे उडाल्याने सहा ते सात जण किरकोळ जखमी झाले. त्यातील काहींना उपचार करून सोडण्यात आले, तर काहींना शुक्रवारी सोडले जाईल, असे करार पोलिस ठाण्यातून सांगण्यात आले. आरोपी सिंग याचे इमिटेशन दागिने पॉलिश करण्याचा व्यवसाय आहे. त्याच्या शेजारीच मयूर कानोजिया (२०) याचा दागिने बनवण्याचा कारखाना आहे. दोघांमध्ये नियमित व्यवहार होत होते. एका व्यवहारात कानोजियाने २६,४०० रुपयांऐवजी २७ हजार रुपये सिंगला दिले. ते लक्षात येताच त्याने अतिरिक्त सहाशे रुपयांची मागणी सिंगकडे केली. ते देण्यास सिंगने नकार दिला. त्यावरून दोघांमध्ये वाद झाला. या वादानंतर बुधवारी कमोजिया सहा ते सात साथीदार सोबत घेत सिंगच्या दुकानात शिरला. पुन्हा वाद झाला. वाद तीव्र होताच सिंगने इमिटेशन ज्वेलरी पॉलिश करण्यासाठी वापर होणारे ॲसिडमिश्रित पाणी सर्वांवर भिरकावले. या प्रकरणात कनोजिया आणि त्याच्या साथीदारांविरोधातही कुरार पोलिसांनी दंगलीचा गुन्हा नोंदवला.