अकरावीच्या प्रवेशासाठी आजपासून नोंदणी

अकरावीच्या प्रवेशासाठी आजपासून नोंदणी
भाग-१ भरण्यास होणार सुरुवात

मुंबई, ता. ९ ः राज्यातील कनिष्ठ महाविद्यालयांमध्ये २०२६-२७ या शैक्षणिक वर्षातील अकरावीच्या प्रवेशासाठी शालेय शिक्षण विभागाकडून पहिल्या टप्प्यातील भाग एक भरण्याची प्रक्रिया सुरू करण्याचा निर्णय घेण्यात आला आहे. यासाठी शुक्रवारी (ता. १०) सकाळी १० वाजता अकरावी प्रवेशाच्या संदर्भातील भाग-१ भरण्यासाठी ऑनलाइन सेवा उपलब्ध करून दिली जाणार आहे.
विद्यार्थ्यांना यामध्ये दहावीच्या परीक्षेसंदर्भात तसेच त्यांची इतर सविस्तर माहिती भरणे आवश्यक आहे. दुसऱ्या टप्प्यातील भाग-२ हा दहावीच्या परीक्षेचा निकाल लागल्यानंतर भरण्यासाठीची सुविधा उपलब्ध करून दिली जाईल, अशी माहिती माध्यमिक शिक्षण संचालनालयाचे संचालक डॉ. महेश पालकर यांनी दिली. मागील वर्षी अकरावी प्रवेश यासंदर्भात झालेली एकूणच अनागोंदी लक्षात घेऊन येत्या शैक्षणिक वर्षांमध्ये अकरावी प्रवेश प्रक्रिया अत्यंत सुलभ आणि वेळेत पूर्ण करण्यासाठी मोठ्या प्रमाणात बदल केले जाणार आहेत. यासाठी नुकतेच शालेय शिक्षण विभागाच्या उच्चस्तरीय अधिकाऱ्यांची दिवसभर एक बैठक पार पडली. यामध्ये अनेक बदल करण्यासाठी विभागाने तयारी दर्शवली आहे. या नवीन बदलांसंदर्भात सुधारित आदेशही लवकरच जारी करण्यात येणार आहे. या आदेशामध्ये अकरावी ऑनलाइन प्रवेश प्रक्रिया राज्यभरात राबवत असताना विविध प्रकारच्या कोट्यांसाठी देण्यात येणारी मुदत आणि त्यासोबतच ही प्रवेश प्रक्रिया मुदतीत कशी पार पाडली जाईल, यासंदर्भात खबरदारी घेतली जाणार आहे.