मालाडचा भोंदू माँटीबाबाला अटक

मालाडचा भोंदू माँटीबाबाला अटक
आर्थिक फसवणुकीच्या तक्रारीवरून कारवाई

मुंबई, ता. १६ ः व्यायामशाळेतील प्रशिक्षकाची नोकरी सोडून भोंदूगिरी करणाऱ्या मालाडच्या रिदम पांचाळ ऊर्फ माँटी बाबा या तरुणास दिंडोशी पोलिसांनी बेड्या ठोकल्या. आर्थिक फसवणुकीच्या तक्रारीवरून पोलिसांनी गोपनीय तपास करून ही कारवाई केली.
चार वर्षांपूर्वी रिदम परिसरातील एका अद्ययावत व्यायामशाळेत प्रशिक्षक म्हणून नोकरी करत असे. एकेदिवशी अचानक त्याने आपल्याला दैवी शक्ती प्राप्त झाली असून विविध देव अंगी संचारतात, असे भासवण्यास सुरुवात केली. आपण दैवी शक्तीद्वारे वैयक्तिक, व्यावसायिक अडथळे दूर करू शकतो, असे तो लोकांना सांगत होता. ही माहिती परिसरात वाऱ्यासारखी पसरली. पुढे दर गुरुवारी आणि शनिवारी माँटीबाबाचा दरबार मालाड पूर्वेकडील एका मोकळ्या जागी भरू लागला. येणाऱ्या भक्तांकडे माँटीबाबा दारू, सिगारेट, फरसाण, जिवंत कोंबडी, बोकडाचे काळीज, काळे तीळ आदी साहित्य मागवत होता. दारू, सिगारेट स्वतःसाठी ठेवून इतर साहित्यांसोबत तो अघोरी पूजा करीत होता. हे साहित्य विशिष्ट ठिकाणी फेकण्यास तो सांगत असे. सुरुवातीला दरबारात बरीच गर्दी होऊ लागली; मात्र माँटीबाबाच्या पूजेने समस्या दूर होत नसल्याचे पाहून लोक जाब विचारू लागले. तेव्हा आपल्या आड आल्यास जीवाचे बरेवाईट होईल, असा शाप माँटीबाबा देत असे. तसेच तो गुंडांमार्फत लोकांना धमकावत असे. त्यामुळे कोणीही तक्रार देण्याची हिंमत करत नव्हता. अखेर अनोश मोनोरे या तरुणाने तक्रार दिली, असे पोलिसांनी सांगितले. माँटीबाबाकडून फसवणूक झालेल्या व्यक्तींना तक्रार देण्याचे आवाहन दिंडोशी पोलिसांनी केले आहे.