शेअर बाजारांवर देखरेखीसाठी एआय

शेअर बाजारांवर देखरेखीसाठी एआय
सेबीच्या अध्यक्षांचे सूतोवाच

मुंबई, ता. १० : शेअर बाजारांच्या व्यवहारांवर देखरेख ठेवण्यासाठी एआयसह आधुनिक तंत्रज्ञान वापरण्याचे सूतोवाच सेबीचे अध्यक्ष तुहीनकांत पांडे यांनी येथे केले. त्याच वेळी नियमकांची जबाबदारी बाह्य यंत्रणेवर (आउटसोर्स) सोपवता येणार नाही, असेही त्यांनी सांगितले.
ग्लोबल फिनटेक फेस्टमध्ये त्यांनी हे सांगितले. शेअर बाजारातील धोके व्यवस्थापन यंत्रणेच्या सक्षमीकरणासाठी एआय वापराबाबत इंटरनॅशनल ऑर्गनायझेशन ऑफ सिक्युरिटी कमिशन सुपरवायझरी टूलकिट वापरण्याबाबत विचार चालू आहे, असेही त्यांनी सांगितले. सेबीला स्वतःची देखरेख व्यवस्था तंत्रज्ञानावर आधारित करावयाची आहे. अर्थात यात केवळ ही व्यवस्था यांत्रिक करण्याचे उद्दिष्ट नाही, तर शेअर बाजारातील जे पॅटर्न परंपरागत पद्धतीने आढळून येत नाहीत, त्या बाबी डेटा, अनालिटिक्स आणि एआयमार्फत ओळखाव्यात, असा हेतू आहे. त्यायोगे शेअर बाजारातील धोके आधीच ओळखता येतील, हा हेतू असल्याचे ते म्हणाले. जेव्हा बाजारपेठांमधील खेळाडू आधुनिक तंत्रज्ञान वेगाने आणि मोठ्या प्रमाणावर वापरतात तेव्हा नियमकांनीदेखील तशीच आधुनिक पद्धतीने देखरेख केली पाहिजे. अर्थात आधुनिक तंत्रज्ञान आऊटसोर्स करता येईल; पण जबाबदारी आऊटसोर्स करता येणार नाही, असेही त्यांनी स्पष्ट केले.