गिरणी कामगारांच्या घरासाठी हेदुटणेची साडेचार हेक्टर जागा मिळणार

गिरणी कामगारांच्या घरासाठी हेदुटणेची साडेचार हेक्टर जागा मिळणार
जिल्हाधिकाऱ्यांकडून लवकरच जागेबाबत पत्र मिळणार; ४,५०० घरे उभारता येणार
सकाळ वृत्तसेवा
मुंबई, ता. १२ : गिरणी कामगारांच्या घराचे स्वप्न पूर्ण करण्यासाठी राज्य म्हाडाच्या माध्यमातून मुंबईसह एमएमआर क्षेत्रात जागांचा शोध घेत आहे. त्यानुसार वांगणी, शेलूबरोबरच आता कल्याणनजीक असलेल्या हेदुटणे येथील तब्बल ४.७ हेक्टर शासकीय जमीन म्हाडाला मिळणार आहे. त्याबाबतचे पत्र जिल्हाधिकाऱ्यांकडून लवकरच म्हाडाला सुपूर्द केले जाणार आहे. या जागेवर सुमारे ४,५०० घरे गिरणी कामगारांकरिता उभारणे शक्य होणार आहे.
मुंबईतील एक लाखाहून अधिक गिरणी कामगार घरासाठी पात्र झाले असून, आतापर्यंत सुमारे १७-१८ हजार कामगारांना घरे मिळाली आहेत, तर उर्वरित कामगारांना घरे देण्यासाठी सरकार खासगी विकसकांच्या माध्यमातून शेलू आणि वांगणी येथे घरे उभारत आहे, मात्र वांगणीची घरे कनेक्टिव्हिटीच्या दृष्टीने अडगळीत असल्याने त्याला कामगारांकडून नापसंती दर्शवली जात आहे, तर शेलूला घरे घेण्यास अनेक कामगार तयार आहेत. त्यानंतर आता राज्य सरकारची हेदुटणे येथे असलेली जवळपास साडेआकरा एकर जमीन म्हाडाला मिळणार आहे. त्याबाबत जिल्हाधिकाऱ्यांनी तयारी दर्शवली असल्याची माहिती म्हाडाच्या एका वरिष्ठ अधिकाऱ्याने दिली. ही जमीन ताब्यात आल्यानंतर प्रकल्प अहवाल तयार करून सरकारकडे मंजुरीसाठी पाठवला जाणार आहे.

उत्तर शीवचा नाद सोडणार
शिळफाटा नजीक उत्तर शीव येथे ७.५ हेक्टर सरकारी जमीन असून, त्यावर ७,५०० घरे होऊ शकणार आहेत, मात्र त्या ठिकाणी स्थानिकांचा विरोध असून, त्यांनी म्हाडाला सदर जमिनीची मोजणी करू दिलेली नाही. त्यामुळे सदरची जमीन गिरणी कामगारांच्या घरासाठी घेण्याबाबत तूर्तास म्हाडाने नाद सोडला असल्याची माहिती म्हाडाच्या एका वरिष्ठ अधिकाऱ्याने दिली.