दिवा फाटकाने लोकलचा खोळंबा

दिवा फाटकामुळे लोकलचा खोळंबा
१८ मिनिटे गोंधळ; नऊ लोकल, सहा मेल-एक्स्प्रेसवर परिणाम

सकाळ वृत्तसेवा
मुंबई, ता. ११ : भाऊबीजनिमित्त भाऊ-बहिणींच्या भेटीगाठींसाठी मुंबईकरांची लगबग सुरू असताना बुधवारी (ता. ११) दिवा रेल्वे फाटकावरील वाहतूक कोंडीने प्रवाशांचे नियोजन बिघडवले. रस्त्यावरील वाहनांची गर्दी हटत नसल्याने दुपारी १.३५ ते १.५३ या वेळेत तब्बल १८ मिनिटे फाटक उघडेच राहिले. त्यामुळे मध्य रेल्वेची उपनगरीय वाहतूक विस्कळित झाली. नऊ लोकल आणि सहा मेल-एक्स्प्रेस गाड्या रखडल्या, तर एकूण सुमारे ३० गाड्यांच्या वाहतुकीवर परिणाम झाला. ऐन सणाच्या दिवशी झालेल्या या खोळंब्यामुळे प्रवाशांना मनस्ताप सहन करावा लागला.

दिवा स्थानकाजवळील ‘एलएक्स-२९’ या रेल्वे फाटकावर वाहनांची मोठी गर्दी झाल्याने फाटक बंद करण्यात अडथळा निर्माण झाला. परिणामी दिवा, डोंबिवली आणि कल्याणसह पुढील स्थानकांवरील रेल्वे वाहतुकीवर परिणाम झाला. एकामागोमाग लोकल रखडल्याने स्थानकांवर प्रवाशांची गर्दी वाढली. महिला, ज्येष्ठ नागरिक आणि कुटुंबासह प्रवास करणाऱ्यांना याचा विशेष त्रास झाला. या प्रकारामुळे सीएसएमटी-कल्याण, सीएसएमटी-डोंबिवली, परळ-डोंबिवली, टिटवाळा-सीएसएमटी, कल्याण-दादर, कर्जत-सीएसएमटी, अंबरनाथ-सीएसएमटी आणि कसारा-सीएसएमटी या मार्गांवरील लोकल गाड्यांना फटका बसला. सीएसएमटी-कल्याण मार्गावरील दोन लोकलचा समावेश असल्याने एकूण नऊ लोकल रखडल्या. याशिवाय सहा मेल-एक्स्प्रेस गाड्यांनाही विलंब झाला.

उड्डाणपूल रखडला
दिवा रेल्वे फाटकावरील वाहतूक कोंडीचा प्रश्न अनेक वर्षांपासून प्रलंबित आहे. या ठिकाणी उड्डाणपुलाचे काम रखडल्याने वाहनचालकांना फाटकावरूनच ये-जा करावी लागते. वाहनांची वाढती संख्या आणि फाटकावरील अवलंबित्व यामुळे वारंवार कोंडी होते. त्याचा परिणाम रस्ते वाहतुकीसोबत रेल्वेच्या वेळापत्रकावरही होतो. उड्डाणपुलाचे काम पूर्ण होण्यास विलंब होत असल्याने दिवेकर आणि रेल्वे प्रवाशांची या समस्येतून अद्याप सुटका झालेली नाही.

एका फाटकावर ८९४ लोकलची मदार
दिवा रेल्वे स्थानकातून दररोज सुमारे ८९४ लोकल गाड्यांची ये-जा होते. त्यापैकी ७० ते ७५ टक्के लोकल येथे थांबतात. स्थानकाजवळील रेल्वे फाटक दिवसातून सरासरी ३९ वेळा उघडले जाते. त्यामुळे रस्ते वाहतुकीतील कोंडीचा थेट परिणाम रेल्वेच्या वेळापत्रकावर होतो. अवघ्या १८ मिनिटांच्या अडथळ्यामुळे सुमारे ३० गाड्यांच्या वाहतुकीवर परिणाम झाल्याने फाटकावरील वाहतुकीचे नियोजन आणि पर्यायी व्यवस्थेचा प्रश्न पुन्हा ऐरणीवर आला आहे.