संशयास्पद उत्पादनांवर छापे

संशयास्पद उत्पादनांवर छापे
मान्यता नसलेल्या घटकांचा वापर
सकाळ वृत्तसेवा
मुंबई, ता. १५ : न्यूट्रास्युटिकल्सच्या नावाखाली बाजारात उतरवण्यात येणाऱ्या उत्पादनांवर अन्न व औषध प्रशासनाने राज्यभर धडक कारवाई करत या बाजाराला मोठा दणका दिला आहे. अन्नसुरक्षा आणि मानक प्राधिकरणाने मान्यता नाकारलेल्या घटकांचा वापर करून तयार करण्यात आलेल्या उत्पादनांचा तब्बल एक कोटी ३८ लाख ९५ हजार ८५२ रुपयांचा साठा जप्त करण्यात आला.

‘मॅग्नेशियम ॲसिटाइल टॉरेट’ आणि ‘निकोटिनामाइड मोनोन्यूक्लिओटाइड’ या घटकांना उत्पादन मान्यता नाकारण्यात आली असतानाही त्यांचा वापर होत असल्याचे ‘एफडीए’च्या कारवाईत समोर आले. राज्यातील सात विभागांमध्ये १७ आस्थापनांची तपासणी करून ही कारवाई करण्यात आली. या कारवाईत मुंबईतील सहा पानटपऱ्यांवरही छापे टाकण्यात आले. दहिसर पूर्व, धारावी, गोरेगाव पश्चिम आणि अँटॉप हिल परिसरातील या दुकानांतून बंदी असलेला गुटखा आणि सुगंधित पानमसाल्याचा ३१ हजार १४९ रुपयांचा साठा जप्त करण्यात आला. पुण्यातील कारवाईत प्रतिबंधित खाद्यपदार्थांसह वाहन मिळून पाच लाख ६१ हजार २७० रुपयांचा मुद्देमाल जप्त करण्यात आला.

कोल्हापूर जिल्ह्यातील शिरोळ येथील अव्हेन्यू सुपरमार्ट्सच्या आस्थापनातून संशयित खाद्यतेलाचे २१ हजार ४ लिटर साठवणूक केलेले तेल जप्त करण्यात आले. त्याची किंमत ४५ लाख ९५ हजार २६० रुपये आहे. या तेलाचे नमुने प्रयोगशाळेत तपासणीसाठी पाठवण्यात आले आहेत.