विहिरीत बुडून तरुणाचा मृत्यू

मुरूड, ता. ११ (बातमीदार) : भाच्याला पोहायला शिकवताना मामाचा विहिरीत बुडून मृत्यू झाल्याची घटना मंगळवारी (ता. ११) दुपारी साडेबाराच्या सुमारास मुरूडनजीकच्या विहूर गावात घडली आहे. नदीम पांगारकर (वय २७) असे विहिरीत बुडून मृत झालेल्या तरुणाचे नाव आहे. मुरूड पोलिस ठाणे हद्दीतील विहूर गावात नदीम पांगारकर हा मंगळवारी आपल्या घरामागे असणाऱ्या विहिरीमध्ये भाचा शाजेब इम्रान कारभारी (वय १७) याला पोहायला शिकवत होता. त्या वेळी अचानक त्याला श्वाच्छोछ्श्वास घेण्यास त्रास झाल्यामुळे दमछाक होऊन तो विहिरीत बुडाला. ही घटना परिसरातील नागरिकांना समजताच त्यांनी तातडीने भाच्याला बाहेर काढले. शाजेबच्या मदतीला शेजारी धावून आल्याने त्याचे प्राण वाचवण्यात यश आले. शाजेबला अलिबाग जिल्हा रुग्णालयात प्राथमिक उपचार करून पुढील उपचारासाठी पनवेलच्या एमजीएम रुग्णालयात दाखल करण्यात आहे. त्याची प्रकृती सुधारत असल्याचे नातेवाईकांनी सांगितले. मुरूड पोलिस ठाण्यात घटनेची नोंद झाली आहे.