मजगाव मधील आरावघर ची मोरी अतिवृष्टि मुळे वाहून गेल्याने ग्रामस्थांची अडचण

मोरी वाहून गेल्‍याने वाहतुकीत अडथळा

मुरूड, ता. १० (बातमीदार) ः तालुक्यातील मजगाव ग्रामपंचायतमधील आरावघरसह पाच गावांना जोडणाऱ्या रस्त्यावरील मोरी अतिवृष्टीत पाण्याच्या प्रवाहामुळे वाहून गेली. आता केवळ दुचाकी जाईल इतकाच रस्‍ता शिल्‍लक राहिल्‍याने ग्रामस्‍थांची गैरसोय होत आहे. दुचाकी जाईल एवढाच रस्ता शिल्लक राहिल्याने ग्रामस्थांची अडचण होत आहे .
मजगावपासून दीड किलोमीटर अंतरावरील आरावघर जवळ असलेली मोरीचे पावसामुळे नुकसान झाले आहे. त्‍यामुळे घानवट, वेळास्ते, पोफळी, वावे व वांद्रे या गावातील नागरिकांना वर्दळीत अडचण निर्माण झाली आहे. भात लावणीचा हंगाम असल्याने बैलगाडी, टेम्‍पो, रिक्षातून खते, अन्य वस्‍तूंची वाहतूक करावी लागते. शालेय विद्यार्थीही याच मार्गावरून ये-जा करतात. मोरी वाहून गेल्‍याने रस्‍ता धोकादायक बनला आहे. जिल्‍हा परिषदेने लवकरात लवकर मोरीची डागडुजी करावी, अशी मागणी परिसरातील ग्रामस्‍थांकडून होत आहे.