खोरा बंदरात उसळल्‍या लाटा

मुरूड, ता. २५ (बातमीदार) ः खोरा बंदरातील समुद्र किनाऱ्यावर रविवारी लाटांचा जोर चांगलाच वाढला होता. हवामान विभागाने किनारपट्टीवर गावांना तसेच नागरिकांना सतर्कतेचा इशारा दिला आहे. मच्छीमारांनी खोल समुद्रात जाऊ नये, असे आवाहन प्रशासक तथा मुख्याधिकारी सचिन बच्छाव यांनी केले आहे.
शनिवारपासून समुद्राला मोठे उधाण आले आहे. पुढील तीन दिवस किनारपट्टी भागात वादळी वारे आणि वादळी पावसाचा अंदाज हवामान विभागाने वर्तवला आहे. मुरूडला दिवसभरात ३५ मिमी पावसाची नोंद झाली असून आतापर्यंत १६९ मिमी पावस पडला आहे. शनिवारी रात्रीपासून पावसाचा जोर वाढल्‍याने जनजीवन विस्कळित झाले आहे. जंजिरा व पद्मदुर्ग शनिवारपासूनच बंद झाल्याने हौशी पर्यटकांची निराशा झाली.
अरबी समुद्रात चक्रीवादळ तयार होत असल्याने कोकण किनारपट्टीवरील गावांना धोक्याचा इशारा देण्यात आला आहे. २०२० मध्ये आलेल्‍या चक्रीवादळात ६२९ हेक्टरवरील आंबा, ७८ हेक्टरवरील नारळ, १४२ हेक्टरवरील सुपारी तर अन्य ६२ हेक्टर क्षेत्रावरील फळझाडांचे नुकसान झाले होते. यंदा पावसामुळे शेतीच्या कामांमध्ये अडथळा येत असून ७ जूननंतर पावसाचा जोर वाढण्याची शक्‍यता आहे. धूळपेरणीपूर्वी नांगरणीदेखील न झाल्याने ट्रॅक्टर मालकांचा भाव वधारला आहे. मान्सूनपूर्व शेतीच्या मशागतीसाठी उघडीप आवश्‍यक असून ढगाळ वातावरणामुळे कामात बाधा येत आहे.