कृषीयोजनेसाठी ‘ॲग्रीस्टॅक’ नोंदणी करणे बंधनकारक

कृषी योजनेसाठी ‘ॲग्रीस्टॅक’ नोंदणी करणे बंधनकारक
पीएम किसान, पीकविमा, आपत्ती नुकसानीचा मिळणार लाभ
मुरूड, ता. १२ (बातमीदार) ः राज्यातील शेतकऱ्यांना शेतीसाठी आवश्यक असलेल्या सरकारी योजनांचा लाभ घेण्यासाठी आता ‘ॲग्रीस्टॅक’ नोंदणी बंधनकारक करण्यात आली आहे.
नोंदणी केल्याशिवाय पीएम किसान, पीकविमा, आपत्ती नुकसानभरपाई यांसारख्या योजना मिळणार नसल्याचे कृषी विभागाकडून सांगण्यात येत आहे.
राज्यातील कृषी क्षेत्रात डिजिटल सेवांचा वापर करून शासनाच्या विविध योजनांचा जलद गतीने व परिणामकारकरीत्या लाभ शेतकऱ्यांना देणे सुलभ व्हावे, याकरिता केंद्र शासनाची ‘ॲग्रीस्टॅक’ योजना राबविण्यात येत आहे. ॲग्रीस्टॅक नोंदणी करून शेतकरी ओळखपत्र (फार्मर आयडी) काढल्याशिवाय कृषी विभागाच्या योजनांचा लाभ मिळणार नसल्याने त्‍याची नोंदणी करावी, असे आवाहन तालुका कृषी अधिकारी मनीषा भुजबळ यांनी केले आहे. ॲग्रीस्टॅक योजनेमुळे शेतकऱ्यांना पीएम किसान योजना, नमो किसान योजना, पीक विमा तसेच आपत्ती व्यवस्थापनअंतर्गत नुकसानभरपाई, पीक कर्ज तसेच कृषी विभागामार्फत प्रात्यक्षिकांतर्गत बियाणे, निविष्ठा व इतर विविध योजनांचा थेट लाभ मिळणार असून डिजिटल पद्धतीने जमीन नोंदीमुळे शेतकऱ्यांचा वेळ आणि खर्च वाचणार आहे.
....................
११ हजार शेतकऱ्यांची नोंदणी नाही
या योजनेअंतर्गत सर्व शेतकऱ्यांचा व त्यांच्या शेतांचा आधार संलग्न माहिती संच (फार्मर रजिस्ट्री), शेतकऱ्यांच्या शेतातील हंगामी पिकांचा माहिती संच (क्रॉप सोन रजिस्ट्री) व शेतांचे भू- संदर्भिकृत (जिओ रेफरन्स लँड पार्सल) यांचा माहिती संच एकत्रितरीत्या तयार करण्यात येत आहे. ॲग्रीस्टॅक’मध्ये मुरूड तालुक्यातून अद्यापही ११ हजार शेतकऱ्यांची नोंदणी नाही. पीएम किसानच्या लाभार्थीपैकी १,६४८ शेतकऱ्यांनी अद्याप ॲग्रीस्टॅक नोंदणी केलेली नाही. उर्वरित शेतकऱ्यांनी तत्काळ नोंदणी न केल्यास त्यांना इतर योजनांचा लाभ मिळण्यास अडचण येईल. त्यामुळे उर्वरित शेतकऱ्यांनी तत्काळ ॲग्रीस्टॅक पोर्टलवर नोंदणी करावी, असे आवाहन करण्यात आले आहे.