म्हसळ्यात विठूनामाचा जागर

म्हसळ्यात विठूनामाचा जागर
म्हसळा, ता. ७ (बातमीदार) ः ‘पायी हळू हळू चाला मुखाने हरी नाम बोला...’, ‘जय हरी विठ्ठल जय जय विठ्ठल...’ असा जयघोष करीत म्हसळ्यात शाळेय विद्यार्थ्यांची दिंडी निघाली. केशवराव खांबेटे सार्वजनिक वाचनालय आणि न्यू इंग्लिश स्कूल आणि ज्युनियर कॉलेज म्हसळा यांच्या संयुक्त विद्यमाने आषाढी एकादशीच्या पूर्वसंध्येला हा दिंडी सोहळा पार पडला. प्राचार्य डी. आर. पाटील, केशवराव खांबेटे सार्वजनिक वाचनालयाचे अध्यक्ष संजय खांबेटे यांच्या प्रमुख उपस्थितीत दिंडी सोहळ्यास खांबेटे, रेखा धारिया, एकनाथ पाटील, पर्यवेक्षक जे. के. मांजरेकर, क्रीडा शिक्षक हनुमंत मोरे, सांस्कृतिक विभागप्रमुख एस. ए. शिर्के, विद्यालयाचे शिक्षक, शिक्षकेतर कर्मचारी आणि मान्यवर उपस्थित होते. पंढरपूरचा विठोबा हा अवघ्या महाराष्ट्राचे आराध्य दैवत असून आषाढी एकादशीला वारकरी मेळा भरला जातो. त्यानिमित्ताने टाळ-मृदंग, पताके, भगवे झेंडे हातात घेऊन नऊवारी साड्या, डोक्यावर तुळशी वृंदावन घेऊन, वारकरी संप्रदायातील वेशभूषा परिधान करून विद्यार्थ्यांनी पारंपरिक वेषात पंढरपूरच्या विठोबाचा जयघोष करीत दिंडी काढून अभ्यासात यश लाभो, चांगले आरोग्य लाभो, असे साकडे पांडुरंगाला घातले.