म्हसळ्यात चोरीच्या उद्देशाने वयोवृद्ध महिलेची हत्या

म्हसळ्यात चोरीच्या उद्देशाने वयोवृद्ध महिलेची हत्या
म्हसळा, ता. २८ (बातमीदार) : कणघर गावातील दोन अल्पवयीन मुलांनी घरात एकटी राहणाऱ्या ७५ वर्षे वयोवृद्ध महिलेचा गळा दाबून हत्या केल्याचा प्रकार उघडकीस आला आहे. ही घटना बुधवारी (ता. २३) घडली असून, शेवंती सखाराम भावे असे मृत महिलेचे नाव आहे. आरोपी शेवंती यांच्या गळ्यातील व कानातील दागिने चोरी करण्याच्या उद्देशाने ही हत्या केल्याचे समजते.
आरोपींनी या आजीच्या गळा, कानातील नऊ ग्रॅम वजनाचे ७० हजार रुपये किमतीचे दागिने लंपास करून त्यांचा नैसर्गिक मृत्यू झाल्याचे भासविले. शेवंता यांचा अंत्यविधी पार पडून चार दिवस उलटून गेले, तेव्हा तिचे दागिने गेले कुठे म्हणून नातलगांनी शोध घेतला असता, त्यांची हत्या झाली असल्याचे लक्षात आले. त्यानंतर त्यांचा मुलगा सुरेश सखाराम भावे यांनी म्हसळा पोलिस ठाण्यात फिर्याद दाखल केली असता, पोलिसांनी शिताफीने शोध घेऊन या प्रकरणात १६ व १७ वर्षांच्या दोन अल्पवयीन आरोपींना गजाआड केले. आरोपींवर म्हसळा पोलिस ठाण्यात गुन्हा नोंद करण्यात आला असून, त्यांना कर्जत येथील बाल सुधारगृहात रवाना करण्यात आले असल्याचे सांगण्यात आले.