ई-रिक्षा सेवेला एक वर्ष पूर्ण

माथेरान, ता. १० (बातमीदार) : माथेरानमध्ये सर्वोच्च न्यायालयाच्या आदेशाने प्रयोगिक तत्त्वावर ई-रिक्षा सुरू झाल्या आहेत. श्रमिक हातरिक्षाचालक-मालक संस्थेकडे स्टेअरिंग दिल्यानंतर एका वर्षात दोन लाख प्रवासी पर्यटकांनी या सेवेचा लाभ घेतला आहे. तसेच, शालेय विद्यार्थ्यांना व रुग्णांना ई-रिक्षाची अविरत सेवा देण्यात आली आहे. सेवेला १० जूनला एक वर्ष पूर्ण झाले.
प्रायोगिक तत्त्वावर २० ई-रिक्षा सुरू करण्याच्या आदेशानंतर माथेरान नगरपालिकेच्या मार्गदर्शक सूचीनुसार श्रमिक हातरिक्षाचालक-मालक संघटनेकडून प्रायोगिक तत्त्वावर ई-रिक्षा सुरू करण्यात आल्या आहेत. १० जून २०२४ला या संघटनेच्या सदस्यांनी हातात स्टेअरिंग धरले. तेव्हापासून शालेय विद्यार्थ्यांसाठी १५ रिक्षा आणि पाच रिक्षा या रुग्ण आणि पर्यटक यांच्यासाठी तरतूद करण्यात आली. फक्त २० ई-रिक्षा असताना हे आव्हान स्वीकारून दररोज ३५० विद्यार्थ्यांना शाळेत सोडणे आणि आणणे ही अविरत व अखंडित सेवा देण्यात आली. पर्यटकांना कमी रिक्षा संख्या असतानासुद्धा सेवा देण्यात आली. एका वर्षात दोन लाख प्रवासी पर्यटकांनी या सेवेचा लाभ घेतल्याचे संघटनेकडून सांगण्यात आले. तसेच, रुग्णांना दिवस-रात्र सेवा देण्यात आली. ५९२ रुग्णांनी या सेवेचा लाभ घेतला.
--------------------
तिन्ही ऋतूंत सुरळीत
ई-रिक्षा तिन्ही ऋतूंत कशा पद्धतीने सेवा देते, याचे निरीक्षण करण्यासाठी सनियंत्रण समितीने पालिकेला आदेश दिले होते. त्यानुसार पावसाळा, हिवाळा व उन्हाळा या तिन्ही ऋतूंत ई-रिक्षांनी संख्या कमी असतानासुद्धा अविरत सेवा दिली. माथेरानमध्ये जोरदार पाऊस पडतो, कधी मुसळधार तर कधी अतिवृष्टी होते. या पावसाच्या दिवसात ई-रिक्षा कशी धावते, याचे निरीक्षण करीत असताना एकही अपघात न होता चांगली सेवा दिल्याचे संघटनेकडून सांगण्यात आले.
----------------------
सर्वोच्च न्यायालयाने आदेश दिल्यानंतर राज्य सरकार, सनियंत्रण समिती यांच्या सूचनेनुसार पावसाळ्यात ई-रिक्षा सुस्थितीत धावतात का, हे पाहण्यासाठी प्रायोगिक तत्त्वावर ई-रिक्षा सुरू झाल्या. तिन्ही ऋतूंत रिक्षाचा सुरक्षित प्रवास झाला. त्यामुळे आता ९४ हातरिक्षाचालकांना ई-रिक्षा मिळण्याचा अहवाल राज्य सरकारमार्फत सर्वोच्च न्यायालयात द्यायला हवा.
- सुनील शिंदे, याचिकाकर्ते