ई रिक्षावर नैसर्गिक आपत्ती,सुकलेले झाड चालत्या ई रिक्षावर पडले,चालकासह प्रवासी जखमी

सुकलेले झाड ई-रिक्षावर पडले
चालकासह प्रवासी जखमी

माथेरान ता. १४ (बातमीदार) : प्रसिद्ध पर्यटनस्थळ असलेल्या माथेरानमध्ये शासनाच्या वतीने सुरू असलेल्या पायलट प्रोजेक्टमधील धावत्या ई-रिक्षावर नैसर्गिक आपत्ती ओढावली. आज सकाळी ७ वाजताच्या सुमारास महात्मा गांधी मार्गावरील काळोखी येथील उताराच्या मार्गावर भले मोठे झाड रिक्षावर पडून अपघात झाल्याची घटना घडली असून, यात चालकासह तीन प्रवासी जखमी झाले आहेत.
दस्तुरी ई-रिक्षा थांब्यावरून माथेरानच्या दिशेला येणाऱ्या रिक्षावर जांभळाचे मोठे सुकलेले झाड मुळासकट पडल्याने मोठी दुर्घटना घडली. यामधून प्रवास करीत असलले तीन प्रवासी आणि चालक प्रशांत गायकवाड हे जखमी झाले. दरम्यान, मागून येत असलेल्या रिक्षातील सागर जोशी व अब्दुल महापुळे ह्या प्रवाशांनी जखमी प्रवाशांना माथेरान नगर परिषदेच्या बी. जे. हॉस्पिटल येथे पाठवले. वैद्यकीय अधिकाऱ्यांच्या सल्ल्यानुसार त्यातील तीन प्रवाशांना पुढील उपचारासाठी उल्हासनगर येथील सेंट्रल हॉस्पिटल येथे हलविण्यात आले आहे. रिक्षावर झाड कोसळण्याची ही दुसरी वेळ असून, वन विभाग व नगर पलिकेकडून दुपारी ३ वाजेपर्यंत पंचनामा केला नसल्यामुळे चालकाचे भाऊ प्रवीण गायकवाड यांनी प्रशासनावर तीव्र नाराजी व्यक्त केली.
झाड कोसळले त्या ठिकाणी अर्धा रस्ता जांभा दगड आणि अर्धा रस्ता क्ले-पेव्हर ब्लॉकचा असल्याने चालकाला या चढावरून गाडी काढता आली नाही. जांभ्या दगडाचा रस्ता अतिशय खराब झाल्याने खड्डे पडले असून, गाडी पळवणे म्हणजे अपघाताला आमंत्रण देण्यासारखे आहे, असे ई-रिक्षाचालकांचे म्हणणे आहे.