दुचाकींच्या धडकेत एकाचा मृत्यू

कासा, ता. २५ (बातमीदार) ः दोन दुचाकींची समोरासमोर धडक होऊन अपघात झाल्याची घटना डहाणू तालुक्यातील कासा - सायवन राज्यमार्गावर घडली. यात एकाचा मृत्यू झाला; तर एक जण जखमी झाला. सुभाष विश्नोई असे मृत व्यक्तीचे नाव आहे.

घरोघरी जाऊन गॅसदुरुस्ती करणारे सुभाष विश्नोई हे २१ जानेवारी रोजी आपले काम आटोपून कासा येथे येण्यासाठी निघाले होते. धरमपूर गावच्या हद्दीत ते आले असता आकाश भंडार यांच्या दुचाकीची विश्नोई यांच्या दुचाकीला जोराची धडक बसली. यात दोन्ही दुचाकी खाली पडल्या. भंडार यांच्या दुचाकीवर त्यांच्या पत्नी जयेंदा भंडार व लहान मुलगी स्नेहल होत्या. त्यांनाही याचा मार लागला. या धडकेत सुभाष विश्नोई यांना गंभीर मार बसला. त्यांना सेल्वासा येथील रुग्णालयात दाखल करण्यात आले; पण त्यांचा उपचारादरम्यान मृत्यू झाला. याप्रकरणी कासा पोलिस ठाण्यात नोंद करण्यात आली आहे.