ठाण्यात आगीच्या दोन घटना

ठाणे, ता. ४ (वार्ताहर) ः ठाण्यात शुक्रवारी (ता. ३) आग लागण्याच्या दोन घटना घडल्या. पहिल्या घटनेत दादोजी कोंडदेव स्टेडियमजवळील विद्युत डीपीला आग लागली; तर दुसऱ्या घटनेत कोपरी पूर्व येथे थांबवलेल्या चारचाकीने अचानक पेट घेतला. या दोन्ही घटना दुपारी अनुक्रमे साडेबारा आणि दीडच्या सुमारास घडल्या, अशी माहिती आपत्ती व्यवस्थापन विभागाने दिली.

ठाण्याच्या कोपरी परिसरातील सिद्धिविनायक मंदिराजवळ, नातू परांजपे कॉलनी, कोपरी, ठाणे (पू.) या ठिकाणी थांबवलेल्या बलेनो कारला अचानक आग लागली. घटनेची माहिती मिळताच घटनास्थळी कोपरी पोलिस ठाण्याचे कर्मचारी व अग्निशमन दलाचे जवान यांनी धाव घेतली. काही वेळातच त्यांनी आगीवर नियंत्रण मिळवले; तर दुपारी जवाहरबाग अग्निशमन केंद्र, दादोजी कोंडदेव स्टेडियमच्या बाजूला, जांभळी नाका या ठिकाणी महावितरणच्या इलेक्ट्रिक डीपीला किरकोळ आग लागली होती. अग्निशमन दलाने त्वरित ही आग विझवली.