नाशिकच्या ठाकरे गटाला खिंडार

सकाळ वृत्तसेवा
ठाणे, ता. ६ : आदित्य ठाकरे यांच्या शिवसंवाद यात्रेच्या आधी शिंदे गटाने उद्धव ठाकरे गटाला पुन्हा एकदा धक्का दिला आहे. नाशिक जिल्ह्यातील ज्येष्ठ शिवसैनिक, माजी नगरसेवक, पदाधिकारी अशा ५० हून अधिक जणांनी बाळासाहेबांची शिवसेना पक्षात प्रवेश केला. मुख्यमंत्री एकनाथ शिंदे यांच्या ठाण्यातील निवासस्थानी त्यांच्या उपस्थितीत आज (ता. ६) प्रवेश झाला.

आदित्य ठाकरे यांच्या वरळी मतदारसंघातील माजी नगरसेविकेने नुकताच बाळासाहेबांची शिवसेना पक्षात प्रवेश केला आहे. मागील काही महिन्यांत उद्धव ठाकरे गटातील शिवसैनिक बाळासाहेबांची शिवसेना पक्षात प्रवेश करीत आहेत. नाशिक ग्रामीणमधील ५० हून अधिक पदाधिकाऱ्यांनी सोमवारी प्रवेश केला. यात ज्येष्ठ शिवसैनिक शिवाजी पालकर, माजी महानगर प्रमुख राजेंद्र घुले, गणेश शेलार, रामभाऊ तांबे, प्रशांत जाधव, मंगेश दिघे, मयूर जोशी, नीलेश शेवाळे आदी पदाधिकाऱ्यांचा समावेश आहे. आनंद दिघे यांच्या काही सहकाऱ्यांचा समावेश असून गटातील कारभाराला कंटाळून प्रवेश केल्याचे सांगितले. नाशिक बाळासाहेबांची शिवसेना जिल्हाप्रमुख अजय बोरास्ते यांच्या नेतृत्वाखाली हा प्रवेश झाला. घराणेशाहीच्या विरोधात हा प्रवेश केला. हिंदुत्वाला पाठिंबा देण्यासाठी या पदाधिकाऱ्यांनी प्रवेश केला असल्याचे मत बाळासाहेबांची शिवसेनेचे प्रवक्ते नरेश म्हस्के यांनी व्यक्त केले.

ज्यांनी बाळासाहेब ठाकरे यांच्यासोबत काम केले होते, त्यांनी आज बाळासाहेबांची शिवसेना पक्षात प्रवेश केला. त्यामुळे नाशिकमध्ये पक्षाला अधिक बळ मिळेल.
- एकनाथ शिंदे, मुख्यमंत्री