अंबरनाथमध्‍ये पालिका इमारतीच्‍या कामाचा आढावा

अंबरनाथमध्‍ये पालिका इमारतीच्‍या कामाचा आढावा

अंबरनाथ, ता. ८ (बातमीदार) : अंबरनाथ नगरपालिकेच्या नव्या प्रशासकीय इमारत आणि नाट्यगृहाच्या कामाचा आमदार डॉ. बालाजी किणीकर यांनी आढावा घेतला. नगरपालिका मुख्याधिकारी डॉ. प्रशांत रसाळ यांनी त्यांना दोन्ही प्रकल्पांच्या कामाची माहिती दिली.
अंबरनाथ पालिकेच्या माध्यमातून जुन्या नगरपालिका कार्यालयानजीक नवीन प्रशासकीय इमारतीचे बांधकाम सुरू आहे, तसेच सर्कस ग्राऊंडवर नाट्यगृहाचे बांधकाम सुरू आहे. नाट्यगृहाच्या कामाचा वेग समाधानकारक असून, प्रशासकीय इमारतीच्या कामाला वेग देण्याच्या सूचना आमदार किणीकर यांनी दिल्या. मंगळवारी आमदार डॉ. किणीकर यांनी पालिका मुख्याधिकारी डॉ. प्रशांत रसाळ यांच्यासह प्रशासकीय इमारतीची पाहणी केली. माजी नगराध्यक्ष सुनील चौधरी, माजी नगरसेवक अब्दुल शेख, सुभाष साळुंके आदी यावेळी उपस्थित होते. प्रशासकीय इमारतीचे काम अंतिम टप्प्यात असले तरी या ठिकाणी पालिकेतील सर्व खात्यांची कार्यालये सामावून घेण्याची क्षमता नसल्याने वाढीव दोन मजल्यांच्या प्रस्तावाबाबत पाठपुरावा करणार असल्याचे आमदार किणीकर यांनी स्पष्ट केले. या प्रशासकीय इमारतीच्या कामाला निधी कमी पडू दिला जाणार नसल्याचे त्यांनी सांगितले. वाढीव दोन मजल्यांचे काम त्वरित पूर्ण करून नव्या इमारतीमध्ये सर्व कार्यालये स्थलांतरित करण्याच्या सूचना त्यांनी मुख्याधिकाऱ्यांना दिल्या. यासोबतच प्रवेशद्वारासमोर छत्रपती शिवाजी महाराजांचा अश्वारूढ पुतळा बसवण्याबाबत निर्णय घेऊन तो प्रस्ताव देखील सरकारकडे मंजुरीसाठी पाठवण्याच्या सूचना केल्या. प्रशासकीय इमारतीनंतर नव्याने उभारल्या जाणाऱ्या नाट्यगृहाच्या कामाची पाहणी केली. नाट्यगृहाच्या कामाला वेग चांगला असून, नाट्यगृहाची इमारत लवकरात लवकर पूर्ण करण्याच्या सूचनादेखील त्यांनी दिल्या.

ब्रेक घ्या, डोकं चालवा, कोडे सोडवा!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Marathi News Esakal
www.esakal.com