छत्रपती शिवाजी महाराज पार्क आर्ट फेस्टिवलला उत्‍स्‍फूर्त प्रतिसाद!

चेंबूर, ता. ८ (बातमीदार) ः छत्रपती शिवाजी महाराज पार्क ऐतिहासिक स्थळाच्या कलेच्या माध्यमातून गौरव करण्याकरिता शिवसेना नेते व युवा सेनाप्रमुख आदित्य ठाकरे यांच्या संकल्पनेतून २ ते ५ फेब्रुवारीदरम्‍यान छत्रपती शिवाजी महाराज आर्ट फेस्टिवलचे दादर येथील वनिता समाज सभागृहात आयोजन करण्यात आले होते. दर्जेदार कला कौशल्य, इतिहास, खाद्य संस्कृती आणि मनोरंजनाच्या कार्यक्रमाचा समावेश असलेल्या या सोहळ्याला मुंबईकरांनी मोठ्या प्रमाणात सहभाग घेतला होता.
पहिल्या दिवशी छत्रपती शिवाजी महाराजांची प्रतिमा असलेली गोधडीची कलाकृती या फेस्टिवलचे प्रथम आकर्षण ठरले होते. छत्रपती शिवाजी महाराज यांच्या स्पर्शाने पावन झालेली कवड्याची माळ, छत्रपती शिवाजी महाराजांनी राज्याभिषेकाच्या वेळी पाडलेली सुवर्ण होन नाणी, छत्रपती शिवाजी महाराजांची समकालीन परदेशी चित्रकारांनी काढलेली व सध्या जर्मनी, फ्रान्स, रशिया व इंग्लंड देशामधील मूळ चित्रांच्या प्रतिमा प्रथमच मुंबईकरांना पाहता आल्‍या. या भव्य कला महोत्सवाला शिवसेना पक्षप्रमुख उद्धव ठाकरे, रश्मी ठाकरे, शिवसेना नेते व युवा सेनाप्रमुख आमदार आदित्य ठाकरे, खासदार संजय राऊत, शिवसेना नेते दिवाकर रावते आदी मान्‍यवर उपस्थित होते.