ग्रामपंचायत सदस्य लाचलुचपत विभागाच्या जाळ्यात

मनोर, ता. ८ (बातमीदार) : ना हरकत दाखल्यासाठी पैशांची मागणी करणाऱ्या ग्रामपंचायत सदस्यासह एका खासगी इसमाला २५ हजारांची लाच घेताना पालघरच्या लाचलुचपत विभागाने ताब्यात घेतले. ग्रामपंचायत सदस्य अजय शिनवार आणि विक्रांत चुरी याला बुधवारी (ता. ८) सायंकाळी अटक करण्यात आली. बोईसरलगतच्या मान ग्रामपंचायतीचा सदस्य अजय सुरेश शिनवार याने तक्रारदाराकडे महाराष्ट्र प्रदूषण नियंत्रण मंडळाचा परवाना काढण्यासाठी ग्रामपंचायतीकडून ना हरकत दाखला मिळवून देण्यासाठी ५० हजार रुपयांच्या लाचेची मागणी केली होती. या विरोधात तक्रारदाराने पालघर लाचलुचपत विभागाकडे तक्रार केली होती. पडताळणीदरम्यान पैशांची मागणी केल्याचे निष्पन्न झाल्यावर आज दुपारी दीडच्या सुमारास वारांगडे येथील अजय बिअर शॉप येथे सापळा रचला होता. २५ हजार रुपयांची लाच घेताना अजय शिनवार (वय २७) आणि विक्रांत चुरी (वय २९) याला ताब्यात घेण्यात आले.