महाशिवरात्रीपूर्वीच फराळाला महागाईची झळ | Sakal
sakal

बोलून बातमी शोधा

महाशिवरात्रीपूर्वीच फराळाला महागाईची झळ
महाशिवरात्रीपूर्वीच फराळाला महागाईची झळ

महाशिवरात्रीपूर्वीच फराळाला महागाईची झळ

sakal_logo
By

वाशी, ता. १६ (बातमीदार)ः धार्मिक महत्त्व असलेल्या महाशिवरात्रीनिमित्त मोठ्या संख्येने भाविक उपवास करतात. या पार्श्वभूमीवर फराळाच्या पदार्थांना मागणी वाढणार असल्यामुळे दरांमध्ये तेजी बघायला मिळत आहे. आवक मर्यादित असताना शेंगदाण्यालाही वाढती मागणी लक्षात घेता प्रतिकिलो दर दीडशेपार गेला आहे; तर साबुदाण्यानेही प्रतिकिलो पंचाहत्तरी गाठली आहे.
महाशिवरात्रीनिमित्त शहरी भागात विविध ठिकाणी धार्मिक कार्यक्रम पार पडत असतात. यानिमित्ताने फराळाच्या पदार्थांचे वाटप केले जाते, तर घराघरात उपवास केला जात असल्याने किरकोळ बाजारात साबुदाणा, शेंगदाणा, राजगिरा, खजूर आणि फळांच्या मागणीमध्ये वाढ होते. रोजच्या स्वयंपाकासह उपवासात मोठ्या प्रमाणात वापरला जाणारा शेंगदाणा गेल्या काही दिवसांपासून तेजीत आहे. महिन्याभरात शेंगदाणा दरात किलोमागे १५ ते २५ रुपयांची वाढ झाली आहे. ११० ते १२० रुपये प्रतिकिलो दराने विक्री होणारा शेंगदाणा सध्या १३० ते १४० रुपये किलोपर्यंत पोहोचला आहे. नवीन आवक दाखल होईपर्यंत दरांत तेजी कायम राहणार, असा अंदाज व्‍यावसायिकांनी वर्तवला आहे. गेल्या महिन्यात किरकोळ बाजारात ६० ते ६५ रुपये प्रतिकिलोने विक्री होणारा साबुदाणा सध्या ७२ ते ७५ रुपये प्रतिकिलोने विक्री होत आहे. येत्या काही दिवसात दरांत आणखी वाढ होण्याची शक्यता वर्तवली जात आहे.
--------------------------------
खजूर, राजगिरा लाडूला मागणी
फराळाच्या पदार्थांप्रमाणेच खजूर, राजगिराचे तयार लाडू व अन्य पदार्थांच्या मागणीत वाढ नोंदवली जात आहे. सध्या बाजारपेठेत १२० रुपये किलोपासून खजूरविक्रीसाठी उपलब्ध असून, गुणवत्तेनुसार ३०० रुपये प्रतिकिलोपर्यंतचे खजूर बाजारपेठेत उपलब्ध आहेत. राजगिराच्या तीन, सहा, बारा लाडूचे पॅकेट बाजारपेठेत उपलब्ध असून १० रुपयांपासून; तर ४० रुपये दराने विक्री होत आहे.
---------------------------------
फळांनी सजली बाजारपेठ
सध्या बाजारपेठेत द्राक्षांसह विविध हंगामी फळे दाखल झाली आहेत. यात प्रामुख्याने पेरू, चिकू, पपई, सफरचंद या फळांना मागणी वाढलेली आहे. सफरचंदाची आवक मर्यादित असल्याने दर १२० रुपये किलोपासून पुढे आहेत. पेरूचे दर ६० ते ८० रुपये किलो, पपईचे दर ४० रुपये किलोपासून पुढे आहेत. याशिवाय स्ट्रॉबेरी, मोसंबी, संत्रीची जोरदार खरेदी सध्या ग्राहकांकडून केली जाते आहे.