पेण-खोपोली रस्त्यावरील अपघातात दोघांचा मृत्यू

पेण, ता. २८ (वार्ताहर) : पेण-खोपोली रस्त्यावरील पेण सावरसई व गागोदे गावाजवळील खिंडीत झालेल्या दोन वेगवेगळ्या वाहनांच्या अपघातांमध्ये दोघांचा मृत्यू झाल्याची घटना आज घडली.
यातील पहिला अपघात हा गागोदे गावाजवळ झाला असून मोटरसायकल चालक अजय पेटारे (वय ३५, रा. झिराडपाडा, अलिबाग) व मनोज पाटील (वय ३८, रा. कमळपाडा शहाबाज) हे दोघे मोटर सायकल घेऊन पेण-खोपोली रस्त्यावरून खोपोलीकडे जात असताना टेम्पोशी धडक होऊन झालेल्या अपघातात मोटरसायकलवरील मनोज पाटील हा गंभीर जखमी होऊन त्याचा जागीच मृत्यू झाला. दुसरा अपघात सावरसई गावाजवळ होऊन यातील संदीप शिर्के (वय ३१, रा. पाडले, ता. पेण) हा स्कुटीवरून खोपोली बाजूकडून पेणच्या दिशेने येत असताना कारचालकाने समोरच्या वाहनाला ओव्हरटेक करण्याच्या नादात चुकीच्या दिशेने येत मोटरसायकलला समोरून जोरात धडक दिली. या अपघातात मोटरसायकलस्वार संदीप शिर्के जागीच मरण पावल्याची घटना घडली. या अपघातांप्रकरणी पेण पोलिस ठाण्यात गुन्हा दाखल करण्यात आला आहे.