उद्‌घाटन झालेल्या शिल्पाजवळ कचरा

धारावी, ता. १० (बातमीदार) : धारावीतील संत रोहिदास मार्ग व ९० फुटी रस्त्याच्या दरम्यान असलेल्या चौकाचे नुकतेच सौंदर्यीकरण करण्यात आले असून येथे शिल्‍पही उभारले आहे. या शिल्‍पाचे उद्‌घाटन रखडले होते. यासंदर्भात ‘सकाळ’ मध्ये २७ मार्चला ‘चौकाला उद्‌घटनाची प्रतीक्षा’ या मथळ्याखाली वृत्त प्रसिद्ध झाले होते. त्‍यावर रविवारी (ता. ९) आमदार वर्षा गायकवाड यांच्या हस्ते या शिल्‍पाचे उद्‌घाटन झाले; मात्र नागरिकांना लगेचच येथे कचरा टाकून पालिकेच्‍या सौंदर्यीकरणाला तिलांजली दिल्‍याचे दिसून आले आहे.
काही वर्षांपूर्वी येथील चौकाचे पद्मश्री डॉ. सिवांथी आदीथनार चौक असे नामकरण करण्यात आले होते. गल्या दोन वर्षांपासून येथे भूमिगत काम सुरू असल्‍यामुळे चौकाची नासधूस झाली होती. त्‍यानंतर या चौकाची पुनर्बांधणी व सौंदर्यीकरण करण्यात आले आहे; मात्र येथील नागरिकांनी या चौकाच्‍या उद्‌घाटनानंतर दुसऱ्याच दिवशी कचरा टाकल्‍याने संताप व्‍यक्‍त होत आहे. याचा निषेध ज्‍येष्ठ समाजसेवक अनिल कासारे व स्थानिकांनी नोंदवला आहे. जर शिल्प आदर म्हणून उभारले आहे, तर त्याची देखभाल करून घेणे ही जबाबदारी लोकप्रतिनिधी यांची नाही का, असा सवाल कासारे यांनी केला आहे; तर शिल्पाजवळ आमदारांनी आपले नाव लावल्याचा निषेध भाजपकडून करण्यात आला आहे.