१९ वर्षीय तरुणाने वाचवले सहा जणांचे प्राण,

मुंबईत ११ वे अवयवदान
१९ वर्षीय तरुणामुळे सहा जणांना जीवदान

सकाळ वृत्तसेवा
मुंबई, ता. १० : मुंबईसह राज्यात अवयवदानाची मोहीम अधिक तीव्र करण्यात आली आहे. जागतिक आरोग्य दिनानिमित्त राज्यस्तरीय अवयवदान मोहीम हाती घेण्यात आली आहे. दरम्यान, मुंबईत ११ वे यशस्वी अवयवदान पार पडले. एका तरुणाच्या आई-वडिलांनी त्याचे अवयव दान करण्याचा निर्णय घेतल्यामुळे सहा जणांना जीवदान मिळाले.
काही दिवसांपूर्वी मिरा रोडमधील उमराव वोक्हार्ट रुग्णालयात एका १९ वर्षीय मुलाला दाखल करण्यात आले होते. उपचारादरम्यान डॉक्टरांनी त्याला मेंदूमृत घोषित केले. डॉक्टरांनी त्याच्या कुटुंबीयांचे अवयवदानासाठी समुपदेशन केले. त्यानंतर नातेवाईकांनी तरुणाचे अवयव दान करण्याचा निर्णय घेतला. त्यानुसार हृदय, यकृत, फुप्फुस, स्वादुपिंड आणि दोन्ही मूत्रपिंड असे सहा अवयव दान केले आहेत. झेडटीसीसीच्या मार्गदर्शक सूचनांनुसार अवयव दान केल्याची माहिती समन्वयकांनी दिली.
दरम्यान, सरकारी आरोग्य केंद्रांच्या तुलनेत खासगी रुग्णालयांमध्ये अवयवदानाचे प्रमाण आजही कमी आहे, पण अवयवांची गरज असलेल्या रुग्णांची प्रतीक्षा यादी सर्वच स्तरांवर वाढती असून यंदा चळवळीला गती आल्याचे चित्र आहे. मुंबईकरांनी जास्तीत जास्त अवयवदान चळवळीत सहभाग घ्यावा, असे आवाहन करण्यात आले आहे.