कंत्राटदारांच्या भल्यासाठी खड्डे भरण्यास तिप्पट दर!

मुंबई, ता. १० ः मुंबईतील रस्त्यावरील खड्डे भरण्यासाठी ४० कोटी रुपये खर्च केला जात असताना यंदा मात्र मुंबई महापालिकेने पावसाळ्यातील खड्डे भरण्यासाठी तब्बल सव्वाशे कोटी रुपयांचे टेंडर काढले आहे. हा तिप्पट दर कंत्राटदारांचे भले करण्यासाठी असल्याचा आरोप महापालिकेतील माजी विरोधी पक्षनेते रवी राजा यांनी केला आहे.
दरवर्षी पावसाआधी रस्त्यांवरील खड्डे भरण्याचे काम सुरू केले जाते. यंदाही या कामासाठी १२५ कोटी रुपये खर्च केले जाणार आहेत. पश्चिम उपनगर ८४ कोटी रुपये, पूर्व उपनगर २८ कोटी रुपये आणि शहर विभागासाठी १४ कोटी रुपयांची तरतूद करण्यात आली. रॅपिड हार्डनिंग काँक्रीटद्वारे खड्डे भरण्यासाठी ८० कोटी रुपयांची आणि अस्फाल्टद्वारे खड्डे भरण्यासाठी ४५ कोटी रुपयांची तरतूद करण्यात आली. मागील वर्षी मात्र ४० कोटी रुपये खर्च करण्यात आले होते. यंदा ही रक्कम वाढल्याने काँग्रेसने आक्षेप घेतला आहे. खड्डे कुठे पडणार हे प्रशासनाला माहिती आहे का, ही महापालिकेच्या पैशांची उधळपट्टी आहे. कंत्राटदारांच्या भल्यासाठी ही रक्कम वाढवण्यात आली आहे का, असा सवाल विचारत या कामाला स्थगिती देण्यात यावी, अशी मागणीही रवी राजा यांनी केली आहे.